Daugovpiļs Inovaceju centrs svietej pyrmuo goda jubileju

Daugovpiļs Inovaceju centrs svietej pyrmuo goda jubileju

Rokstu sagataveja: portals lakuga.lv

Taišni pyrma goda, 10. decembrī, tyka atkluots Daugovpiļs Inovaceju centrs (DIC), kas sevkuru interesentu aicynoj īpasazeit ar vairuokom interaktivom ekspozicejom, pīsadaleit nūdarbeibuos i pasuokumūs, kab īraudzeitu i izzynuotu fiziku, kimeju, biologeju i cytys zynuotnis vīgļuok saprūtomā veidā.

Daugovpiļs Inovaceju centrs ir vīns nu četru zynuotnis centru, kas Eiropys Ekonomiskuos zonys i Norvegejis finaņšu instrumenta atbaļsteitajā i Izgleiteibys i zynuotnis ministrejis eistynuotajā programā pādejūs godu laikā atkluots četruos Latvejis pošvaļdeibuos. Tī ir: Zynuotnis i inovaceju centrs “Vizium” Ventspilī, Zynuotnis i izgleiteibys inovaceju centrs Līpuojā, Kosmosa izzynuošonys centrs Ciesīs, kai ari Daugovpiļs Inovaceju centrs. Vysu inovacejis centru aizdavums ir taiseit jaunys izgleiteibys i vuiceibu programys školānim, studentim i školuotuojim, lai veicynuotu sadarbeibu školu, augstškolu, zynuotniskūs instituceju i dorba devieju vidē.

DIC aizsuokums vaicojams 2015. godā, kod nazkodejuo kinu teatra telpuos tyka atkluots Zynuotgribiešonys centrs “Zili brīnumi”, 2016. godā tys tyka puorsaukts par “ZINOO Daugavpils”, bet 2019. godā – jau par Daugovpiļs Inovaceju centru, tok, kab sataiseitu myusdīneigys i interaktivys ekspozicejis, tyka dasaisteita vasala vērtine fizikys, biologejis, kimejis, ekonomikys ekspertu.

Itūšaļt centrs pīduovoj četrys ekspozicejis, kas vierzeitys vysaidu vierzīņu atteisteibai: “Biržys brokers”, “Palic uzjiemiejs”, “Šyuna” i “Video animacejis laboratoreja”. Centra apmaklātuojim ir daīmamys vairuokys izzynūšys atrakcejis, par pīmāru, “Vuoveris ritiņs”, kur skrīnūt sevkuram ir vareiba pi reizis ari uzluodēt sovu mobilū teleponu, taipoš ari “Veloatrakceja ar tūrnim”, kas izaicynoj drupeit puorvarēt bailis i tyvuok īpasazeit ari ar taidim fizikalim lelumim kai leidzsvors, dreižums i spāks. Atseviški ir daīmamys vairuokys interešu izgleiteibys i talantu programys.

Karteņā: Daugovpiļs Inovaceju centrs, foto Amanda Anusāne/portals lakuga.lv

DIC puorstuove Kristīne Valaine portalam pastreipoj, ka vysys centra ekspozicejis ir apmaklātuojim interesantys, vystik eipaši varātu izceļt uzjiemiejdarbeibys sadaļu, kura ari Eiropys mārūgā ir vysā unikala. Ekspozicejuos “Biržys brokers” i “Palic uzjiemiejs” apmaklātuojim ir vareiba izpieteit i izzynuot sova uzjāmuma izveidis īspiejis, vuiceitīs īsapierkt i plānuot sovu budžetu, kai ari īpasazeit ar finaņšu tierga byuteibu. Juopastreipoj, ka tys vyss nūteik interaktivā, kruosainā i myusdīneigā vidē, kura ir saistūša naviņ jaunīšim, tok aizraun ari pīaugušūs.

Karteņā: Daugovpiļs Inovaceju centrs, foto Amanda Anusāne/portals lakuga.lv

Centrs napīduovoj klasiskys ekskursejis gida pavadeibā, tok sevkuram apmaklātuojam ir vareiba sovā gaitā izstaiguot vysys ekspozicejis, bet iz vaicuojumim vysod asūt gotovi atbiļdēt i atbaļsteit centra darbinīki. Kai stuosta Kristīne Valaine, goda laikā centrā gastej aptyvai 11 tyukstūšys apmaklātuoju, nu kurūs vairuokumu veidoj vysu vacumu školāni i studenti.

Fotogalereja: Daugovpiļs Inovaceju centrs, Amanda Anusāne, portals lakuga.lv


Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]