Rokstu sagataveja: portals lakuga.lv

16. decembrī Latvejis Nacionalajā bibliotekā nūtiks Lībīšu dīna. Ari portala lakuga.lv redakcejis i latgalīšu kulturys kusteibys “Volūda” puorstuovis dūsīs tū svieteit ar latgaliskom aktivitatem. Partū ituos nedelis īsacejumus vaicojam Robertam Sīlim, kurs dzīd ansambī “Līvlist”, kurū voda latgalīte Diāna Logina. Jis ir audzs lībīšu krostā, Lelirbē, nu ituo krosta īt ari juo vacvacuoki Zoja i Edgars Sīli. Babys muote ir eistyna lībīte nu Saunaga. Tai kai Roberta saimē eisti nav kas turpynuotu dorbu pi lībiskuos kulturys kūpšonys i ituos identitatis puorjimšonys, tod nikas cyts naatlīk, kai dareit pošam, par kū jis soka: “Nav vīgli, naīt nu rūkys, tok kaidam tys ir juodora. Tys vyss ir juotur gūdā i juonudūd tuoļuok.”

Paskaiti portalu livones.net

Paskaiti, kas teik publicāts lībīšu kulturtelpys oficialajā ziņu portalā livones.net. Tī tu izzynuosi vysu aktualū par lībīšu kulturu, volūdi i viesturi, īpazeisi satura veiduotuojus, finanšu guoduotuojus i daudzi kū cytu. Sātyslopa ari varātu but lobs veids, kai izaicynuot sevi skaiteit lībiski.

Paškūrsti lībīšu ābeci

Īpasazeisti ar kaidu nu lībīšu volūdys ābeču. Ir vacuoka ar vysaidom šmukom biļdem, dzīsmem i puorsokom, kai ari jaunuoka – cīši pragmatiska, ar tulkuojumim angļu, igauņu i latvīšu volūduos. Ābeču autore ir Zoja Sīle.

Izzynoj, voi vuords “līvi” ir saisteits ar Leivuonu

Vīns praktisks aizdavums – izzynoj, voi vuords “līvi” ir saisteits ar Leivuonu!