Konkursa “Latgolys prozys skaitejumi 2023” lobuokais dorbs – Ilzis Spergys “Breiveiba”

Konkursa “Latgolys prozys skaitejumi 2023” lobuokais dorbs – Ilzis Spergys “Breiveiba”

Rokstu sagataveja: portals lakuga.lv

7. decembrī Rēzeknē i tīšraidē škārsteiklā nūtyka literaruo konkursa “Latgolys prozys skaitejumi 2023” nūslāguma pasuokums “Proza i karbonadis”, kas beja vīns nu literaturys festivala “Prozas lasījumi” nūtikšonu. Ituo gods konkursā vysu leluokū žurejis punktu skaitu sajēme i par lobuokū tyka atzeits literatis, literaturzynuotneicys Ilzis Spergys stuosts “Breiveiba”.

Latgalīšu kulturys kusteiba “Volūda”, sasadorbojūt ar festivalu “Prozas lasījumi”, catūrtū reizi izsludynuoja konkursu “Latgolys prozys skaitejumi”, kura mierkis ir veicynuot literarū procesu Latgolā. Itūgod par uzvarātuoju 21 raksteituoja konkurencē par lobuokū tyka atzeita literate, literaturzynuotneica Ilze Sperga ar stuostu  “Breiveiba”. Ūtrū vītu dabuoja Vita Briška ar stuostu “Kolteņa teiksmainais CV”, bet trešajā – Sarmīte Trūpa ar stuostim “Par gūvi i marcipanu” i “Par zyrgimi uobelim”, bet atzineibys sajēme autoru Ilzis Aizsilys, Dāvida Rubena, Alda Bukša i Egitys Kancānis dorbi. Konkursa nūslāgums nūtyka 7. decembrī Rēzeknē, “IGGI bārs un karbonādes”, tū beja vareiba pīdzeivuot kai kluotīnē, tai tīšraidē. Nūtikšonā, kū vadeja Kārlis Taranda, izskanēja pīci nu septeņu konkursa laureatu dorbu. Muzykali konkursa nūslāgumu papyldynuoja grupa “Gandreiž 10nīkā”.

Ilze Sperga ir literate, literaturzynuotneica i publiciste, stuostu kruojuma “Dzeiveiba”, bārnu dzejūļu gruomotys “Vuškeņa iz pļovys” i cytu dorbu autore. Bejuse Latvejis Literaturys goda bolvys LALIGABA nominante, latgalīšu literaturys goda bolvys “Boņukys” vairuoku reižu sajiemieja. 2021. gods golā stuostu kruojuma “Dzeiveiba” stuosti aktrisis Ingys Misānis-Grasbergys skaitejumā izskanēja audio formatā ari Latvejis Radio 1 eterā. Pyrmū vītu konkursā Ilze komentej: “Es nagaideju. Kai kotru godu, ari itūgod stuostu īsyuteju, kab podturēt latgaliski rokstūšūs autoru statistiku i konkursa organizatorus. Tys ir mozuokais, kū kai autors varu dareit, ka maņ ir svareigi, kab Latgolys rodūšuo telpa dzeivuotu.”

Konkursā “Latgolys prozys skaitejumi 2023” beja aicynuoti pīsadaleit vysa vacuma Latgolys kulturtelpai pīdareigi autori, kuri roksta prozu. Konkursā, kura devize beja “Es rokstu, bet voi tu skaiteisi?” tyka sajimts 21 vysaidu autoru dorbs kai latvīšu literarajā, tai latgalīšu rokstu volūdā. Konkursam dorbus īsyuteja kai Latgolys kulturtelpā jau zynomi autori, tai debitanti. Īsyuteitūs dorbus vērtēja žureja, kurys sastuovā beja literaturzynuotneica Ilga Šuplinska, rakstneica i redaktore Jana Egle, literaturzynuotnīks Valentins Lukaševičs, konkursa “Latgolys prozys skaitejumi” treis īprīškejūs godu uzvarātuoja Annele Slišāne, kai ari gruomotu blogere Inga Gedžūne. Konkursa žureja, viertejūt Ilzis Spergys stuostu “Breiveiba” komentej: “Dorbam ir lela energeja, īvalk skaiteišonā i byušonā. Ilzis stuosts ir vīla puordūmom par myusu pošu kai skaiteituoju saškaltū, traumātū voi pagaisynuotū identitati. Dorba spāks: kai ba caur absoluti īrostu, sadzeivisku ainu paruodeit vairuoku paaudžu nūlemteibu, atkareibu, īdūmuotū breiveibu. Breineiga ir autoris variešona likt skaiteituojam īsajust kai muotis liktinī i bailēs, tai meitys naspiešonā puorkuopt muotis īzeimuotū rūbežu, pat fiziski nūbāgūt nu vysa, kas par tū atguodynoj.” Stuostu “Breiveiba” var puorskaiteit i nūsaklauseit ITE.

Konkursu “Latgolys prozys skaitejumi 2023” organizēja latgalīšu kulturys kusteiba “Volūda” (bīdreiba “LgSC), tū atbaļsteja literaturys festivals “Prozas lasījumi 2023” (Latvejis Rakstnīku savīneiba), Vaļsts kulturkapitala fonds, SIA “IGGI”, Volūdu sāta, latgalīšu kulturys ziņu portals lakuga.lv i žurnals “Domuzīme”.

Konkursa “Latgolys prozys skaitejumi 2023” nūslāgums. Foto: Amanda Anusāne


Print Friendly, PDF & Email

Kalenders

Jul
19
Pīk
19:00 Koncertizvadums “Atgriežamies La... @ Ikškilis breivdobys estrade
Koncertizvadums “Atgriežamies La... @ Ikškilis breivdobys estrade
Jul 19 @ 19:00 – 21:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]