Svātkim īmūt, sasatikt zīmā – latgaliskī koncerti Daugovpilī i Rēzeknē

Svātkim īmūt, sasatikt zīmā – latgaliskī koncerti Daugovpilī i Rēzeknē

Rokstu sagataveja: portals lakuga.lv

Tyvojūtīs Zīmyssvātkim, vys aktivuoka palīk koncertu dzeive, klauseituojim pīduovojūt daudzveideigu muzykalu pīredzi – nu tradicionaluos i goreiguos muzykys leidz popularajai muzykai. Diveji latgaliski koncerti tyvuokuos nedelis laikā izskanēs Daugovpilī i Rēzeknē. Jau svātdiņ, 17. decembrī, Vīneibys noma koncertzālē paradzāts Zīmys saulgrīžu laika koncerts “Svātki guoja”, sovpus 22. decembrī Rēzeknis nūvoda pošvaļdeibys lelajā zālē jaunu koncertprogramu “Sasatikt zīmā” pīduovuos vokaluo studeja “Skonai”.

“Svātki guoja” Daugovpilī

Svātdiņ, 17. decembrī, 15.00 stuņdēs Vīneibys noma koncertzālē, gatavejūtīs Zīmys saulgrīžu laikam, nūtiks koncerts “Svātki guoja”. Kai viestej tuo organizatori, Zīmys saulgrīži jau nu myusu seņču paaudzis ir prīcys i ļustiešonys laiks, kod tyka svieteita gaismys uzvara puor tymsu, jo piec goda garuokuos nakts saule otkon grīžās iz pavasara pusi. Partū, gatavejūtīs gaismys atīšonai, kūpā ar Latvejis myusu dīnu tautys muzykys grupu “Laiksne”, Vīneibys noma Latvīšu i latgalīšu centra folklorys dzīšmu i deju kūpu “Svātra”, “Svātrys” jaunīšu grupu i “Svātriņu” tiks izdzīduotys Zīmyssvātku laika latvīšu i latgalīšu tautys dzīsmis,  izspālātys tradicionaluos zīmys laika izdareibys i čyguonūs īšona. Koncerts byus bezmoksys.

Grupa “Laiksne” jau 30 godu spielej myusdīneigi interpretātu tautys muzyku, izmontojūt kai tradicionalū muzyku, tai ari tū īkruosojūt ar basgitarys i perkuseju skaņom. Folklorys kūpa “Svātra” sovu dzīduošonys i doncuošonys prīcu duovoj klauseituojim i skateituojim nu 1994. goda. Tuos repertuarā, kas ir izskanējs vairuokūs storptautyskajūs folklorys festivalūs i koncertūs Latvejā, Leitovā, Austrejā, Itālejā i cytur, ir kai godskuortu īražu, tradiceju, gūdu, sadzeivis i mitologiskuos dzīsmis, tai doncojamys kadrilis, lanceti i rūtaļdaņči. Nu 2023. gods “Svātrys” kolektivu ir papyldynuojuse “Svātrys” jaunīšu grupa i bārnu grupa “Svātriņa”.

“Sasatikt zīmā” Rēzeknis nūvodā

Pīktdiņ, 22. decembrī, 18.30 stuņdēs Rēzeknis nūvoda pošvaļdeibys lelajā zālē nūtiks Rēzeknis nūvoda vokaluos studejis “Skonai” pyrma svētku koncerts “Sasatikt zīmā”. Koncertā “Skonai” daleibnīki aicynuos sasatikt zīmā, kab kūpā rostu svātku burveibu i mīru, kaids ir rūnams tik Zīmyssvātku laikā, kai ari nūticēt pat vysmozuokajam breinumam, jo Zīmyssvātkūs vyss pīsapylda. Īīšona koncertā bez moksys.

Rēzeknis nūvoda vokaluos studejis “Skonai” vadeituoja Guntra Kuzmina-Jukna stuosta, ka Zīmyssvātku laika koncerti jim jau palykuši par tradiceju, kod saīt kūpā i skaneigi pavadeit laiku. “Koncertā dzīduos četrys “Skonai” ansambļu grupys vysaidūs vacumpūsmūs, suocūt nu četru da divdesmit septeņu godu. Amplitūda lela, deļtuo ari byus lela dažaideiba i nūskanis. Juoatzeimej, ka koncertā skanēs ari jauni pyrmatskaņuojumi latgaliski. Zīmyssvātki ir breinumu laiks i ari mes kotrys raudzeisim tū breinumu saredzēt sovuos sirdīs,” par gaidomū koncertu stuosta Guntra.


Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]