Vita Briška. Kolteņa teiksmainais CV

Vita Briška. Kolteņa teiksmainais CV

Stuosta autore: Vita Briška

Konkursā “Latgolys prozys skaitejumi 2023”, kura moto itūreiz beja “Es rokstu, bet voi tu skaiteisi?”, ūtrū vītu dabuoja Vita Briška, kura kasdīnā struodoj par geodezisti. Nazkod jei rakstejuse publisku ceļuojumu dīnysgruomotu, tok niu, kai poša soka, “latgalīšu volūdā roksta, sasaroksta, komunicej, bet publicej moz”. Vitys konkursa dorbu kai video, tai puorskaitomā versejā pīduovojam ari portala lakuga.lv skaiteituojim.

Kolteņa teiksmainais CV

“Atbraucem. Paļdis, mašineit!”

Izslādzu aizdedzi, īlīku pyrmajā rūbā. Vēļ paturiešu rūkys iz styuris. Palāka. Opoluo steipe īsuokumā bejuse ar matātu, raupu plastmasu, niu tei nūgludynuota, speid. Taida tīveņa, bet stypra. Cik rūkys tū turiejušys, grūzejušys, slydynuojušys? Plykys, raupys, maigys, ar cymdim… Pasaveru atpakaļgaitys spīgelī. Nā, tū nagrūzeišu. Nūlūku saulissorgu i niu varu izlikt lyupu speidumu, nūteiru skrūpstu tušys druponu nu byuda. Raugu pasmaideit atspulgam spīgelī.

Pavalku palāku plastmasys rūkturi i attaisu durovys. Izkuopu. Drupeit vylcynojūs. Leigonu kusteibu aiztaisu durovys. Atskaņ drupeit metaliska skaņa. Īlīku atslāgu sliedzinē i pagrīžu. Cīši ir.

Ite nu mes asam. I kū niu? Kai lai atsavoda? Nu molys dzierdātu, nūdūmuotu – cik banalai… runoj ar mašynu i vēļ sauc tū vuordā! Kai eistu cylvāku, personu. Iz kurīni pasauļs īt?! A niu – ite i tagad… atguodojūt vysu, kas pīradzāts… Nu, sokit kū gribit, bet ir itai mašynai “dvēseleite”!

Tāvs jau runuojs ar šrota eipašnīkim.

Nazkas ir juodora! Raudzeits nav pagaisynuots! Juoatlosa biļdis i juoroksta.

——–

Auto ar stuostu meklej jaunu saiminīku!

Uzmaneibu, ka meklej parostu mašynu, verīs cytur!

Kolteņš (Mitsubishi Colt) ir eipašs. Jaunajam saiminīkam juobyut rodūšam, uzjiemeigam, auto kirurga/plastiskuo kirurga prasmis i aizarauteiba nūderēs, ka gribiesi izmontuot kai pavadūni, kab puorsavītuotu. Bet der ari cytaidu interesnu jūmu ļauds…

Varbyut tūp kina “Mudrs i bez žielesteibys: Latgola” jeb Holivudys gruovieja “Fast and Furious” latgalīšu verseja (voi kaida leidzeiga kina) i ir vajadzeigs auto kaskaderim? Kolteņa vīns nu sapynu ir pīdzeivuot tū, kai tymuos Holivudys kinuos – vīnā breidī sasatrīc ar blokus braucūšu mašynu suonim i jau nuokamajā breidī izaver tikpat gluds i glauns, kai nikas nabyutum bejs. Taitod, ituos kinys rodūšuo grupa i kaskaderu grupa ir reali pretendenti. Kaskaderim īsuociejim syltai īsokom suokumā izīt kursus, sertificētīs i vyspuor pameklēt cytu variantu.

Varbyut metala muokslinīkim i instalaceju meistarim vajag auto rodūšim projektim? Prīškrūka tiks dūta recikliešonys (recycle), otkonizmontuošonys (reuse) ideju eistynuotuojim, popularizātuojim. Ka cytaiž nā, Kolteņš ir gotovs kliut par donoru i zīduot organus kaidam cytam sugys bruoļam/muosai.

Par vysu piec kuortys.

“Mitsubishi Colt” radeits 1992. godā. Piec tam lelu myuža daļu pavadejs Vuocejā. Ir servisa gruomateņa ar servisu štempelim. Vuocyski. Īroksti veikti regulari, par cytom gaitom viesture klusej.

2008. goda rudiņs. Latgola. “Mitsubishi Colt” teik “nūkristeits” par Kolteņu i palīk par saimis, kurā pīci šoferi, uztycamū i naatjamamū pavadūni tyvuokūs i tuoļuokūs ceļūs.

Tai kai 4/5 šoferu ir sīvītis, nabyus maluots, ka izmotuošu frāzi “ar auto braukuse sīvīte”. Pi tam sirdī drusku muokslinīce, folkloriste, ceļuotuoja, dobys draudzine, jaunuo šofere – auto studente…

Kūpumā Kolteņš jau izbraukuojs trejdeveņus jeb 399999 ar plusu kilometrus pa vysaidys kvalitatis, saguma celim i nacelim, puorsvorā pa Latgolu i Latveju, bet napīminēt nadreikst ari Igauneju, Leitovu, Pūleju.

“Nasaver veiru nu capuris” jeb nasprīd par Kolteņa ītiļpeibu piec uorejuo izskota! Nui jis ir treju durovu automobiļs – tys ir tai, ka kotrā suonā pa durovom i vēļ bagažnīks, nu kura teoretiski var tikt salonā. I ari teiri praktiski – pīmāram, ka pyrmuos divejis durovys ir aizsolušys. Lai voi kai, mašyna paradzāta pīcim brauciejim. Tim, kas siež aizmugurejā ryndā, moza vyngruošona i lūkaneiba garantāta. Kolteņā mīreigai pīteik vītys itaidom kombinacejom:

  • 5 muzykantim (īskaitūt šoferi) i muzykys instrumentim – akordeonam, vejūlei, bungom, ceitaram, tautystārpim;
  • 2 muzykantim + kontrabasam;
  • šoferam + 4 etnografejis studentim nu uorzemu ar 4 mugursūmom, kuruos montys nedelis ekspedicejai, materiali meistarklasem, gastiņči;
  • šoferam + 4 laivuotuojim, 2 pumpejamom laivom, 4 airim, 2 teļtim, 4 mugursūmom ar īdzeivi 3 dīnom i 3 naktim pi dobys i gitarai;
  • prīškys siedeklī veiksmeigai var īsalūceit ari divmetreigs puiss tai, ka nu ceļu leidz zūdam vēļ vītys gona instrumentu kastei.

A ka vēļ nūlūka iz prīšku aizmuguris siedekļus… Tod var sakraut i uobuļu maisus, i guļbu. Pat mebelis.

Bet vysā vysumā jis ir kompakts – vīglai atrast stuovvītu. Ka goduos īstigt, var pasalaimēt, ka taišni tymā breidī garum brauc vītejuo futbola komanda nu maču. Naīs puiši stumt, jī jam i izceļ Kolteņu iz braucama ceļa.

Rātys rūtoj eistynus veirīšus. Kolteņš itamā kategorejā ir eistyns skaistuļs. Ruodīs vēļ vuocu laikūs, nu tymā laikā, kod pa Vuoceju rypuoja, jis ir truopejs rikteigā vātrā ar krusu, kur cīts jumts. Pyrma dažu godu suoce izleist tī vacī īvaiņuojumi. Ryusainī pleki līk dūmuot, ka sovā bierneibā auto daudz laika pavadejs sauļojūtīs i veļdzejūtīs suoļā viejā pi jiurys. Bet par tū viesture klusej.

Bet Kolteņa Latgolys laiku viesture gon zyna stuosteit. Reiz Kolteņam izastyume vaca Volga, cytreiz nu aizmuguris gribēja pajimt zyls Žyguļs, piečuok suonā īdunkuoja lels Tautys vāgis (Volkswagen) ar acimradzūt aizamygluojušu šofera skatīni… Kai var napamaneit Kolteņu?! Reiz piec braucīņa pa seņ nagreidarātu ceļa izstruoduojumu, izaruodeja, ka prīškejuo kreisuo pagrīzīņa ruodeituoja lukturs ir izkrits nu sovys vītys i karinej tik tymūs dažūs vadeņūs. Tei na bāda – “bardačokā” jeb cymdu nūdalejumā kai reiz beja izolenta. I līta dareita, Kolteņš salobuots. Naseņuokuo drama: najauši īsamaļdejom “suņa celeņā” piļsātā, kas pošā Latgolys sirdī. Ui, tys ceļš tak gribēja apreit Kolteņu dzeivu! Laime, ka jam reikle tik vacys pazemis komunikaceju okys izmārā, sagiva viņ aizmugurejū, kreisū ripaku. Zūbu pādi palykuši iz pakalejuo tylta, bet puorsavītuošonys kvalitati tys naītekmej, viņ viereigī automobiļu tīseibu “iz idealu i normativajim aktim atbylstūšu tehniskū stuovūkli” aizstuovi dīz voi tū saprass, i vysdreižuok skaiteis par puorkuopumu, daškiers kaidu puoreiti punktu. Koč īvaiņuojumi vysod tykuši dzīdāti, rātys vys tik palykušys…

A kūrpis Kolteņam glaunys – sudobrainā metalā lītys, ar mainomom zīmys i vosorys pazūlem. I vyspuor Kolteņam ir taids skaiški sorkons ancugs. Nav ni kiršu sorkona, ni spylgtuo, arterialuo ašņa kruosa. Nazkur pa vydu. I šmuka, i nav apleicīnē nivīnys mašynys taišni taidā kruosā! Jis ir pamonoms, jis ir jauks i pīmīleigs, pīmāram, pūli Poznaņā jam lobpruot deve ceļu, īskaitūt tramvaju…

Salonā vītom laika zūbs īsagrauzs. Siedeklim var izmontuot tautiskūs dečus voi pledus (naītylpst komplektacejā). Pīredze naīt vīna – Kolteņš var breineigai iztikt bez dažu elektronisku funkceju, pīmāram, aizmuguris stykla teireituoja, bet apsyldomais styklys dorbojās.

Piedejuos puors zīmuos Kolteņu iz soltū sezonu nūbur Lada Karalīne i jis palīk par Solteņu. Nasaverūt iz burvu varu, prīškejū styklu jis vys tik spiej veiksmeigai atkausēt, a brauciejim teik rekomendāts atbylstūšs apgierbs. Ekstremūs gadejumūs vysod nūder tautiskī deči.

Kolteņā bīži veikta aurys atteireišona ar vysaidu dzīšmu i dzīduotuoju bolsu pozitivi skaistajom vibracejom (skaiti – jam bīži ir bejs juopacīš braucieju dzīduošonys mieginuojumi). A jam pošam ir pīteikami jaudeiga audio/stereo sistema, radeja i pat kasešu magis. Nui… a cik reizis ir bejs, ka ībrauc pogolmā nu bala leidz ar reita gaismeņu. Sagurums vysuos maleņuos. A radejā taišni skaņ loba dzīsme. I kai kuopsi uorā dzīsmis vydā? Juosagaida, lai nūskaņ. I tod vēļ kaids hits… Ruodīs, ka dīdžejs ir pats Kolteņš i grib vēļ pasaballēt. A kasdīnā, tai kai braucieji ir gona muzykali, Kolteņš vysod ar skaņom variejs breidynuot, ka jam vajadzeigs doktors i serviss.

Tehniskuos apkūpis (ellis, filtri) ar vysu tū, ka braucieji drusku pa gaisu i vysod kusteibā, veiktys laiceigi. Maineitys vysaidys detalis – piedejuo goda laikā zūbsyksna, radiators. Servisā golvonais meistars gondreiž sasasveicynuošonys vītā vaicoj “kū itūreiz Micukam dareisim?”. Ar reizi juosoka, ka na jau cīš bīžai braucam, bet pat servisa puišus Kolteņš naatstuoj vīnaldzeigus. Nav dzierdāts, ka vēļ kaidu auto tik personeigi uzrunuotu.

Lai ar Kolteņu varātum rypuot gūdam, jis teik regulari teireits i mozguots. Tik kai jau eistynam veiram, ekstra “make – up” i plastiskuos opereacejis nav bejušys prioritarys. Golvonais ir skrīt, vest, byut nūdereigam. Pīvadumam, jumts ar vysim tim defektim, ir iztureigs i mīreigai var aizvyzynuot goldu iz glaunu pikniku zaļumūs. Kai karaļs ar četržuburu krūni golvā, atlaidit, iz jumta.

Bagažnīkā dzeivoj Peikstuleits. Cytreiz jis snauž, cytreiz kai sisiņs ci cikāde sysynoj. Tī doktors nav vajadzeigs, tī vajadzeiga attapeiba. Laika gaitā asam atkluojuši, kai ar Peikstuleiti tikt golā – kas jū atmūdynoj, i kai jū var otkon aizmidzeit.

BET MOTORS IR LOBS! 1,6 litru benzins.  Kolteņš ir varons žipčiks. Mīreigai i drūsai var apdzeit satiksmē “lānūs divplakšņus”, “glīmežus”. Ari tūs lelūs satiksmis autobusus, kuri par gūda pīnuokumu tur čunčynuošonu krītni zam atļautuo uotruma tuo vītā, lai brauktu ar atļautū uotrumu i nūstuotu vysuos paradzātajuos pīturuos i taidā veidā īsakļautu sovūs grafikūs. Lai voi kai, ka ir vajadzeiba, damīdz tik Kolteņa gāzis pedali i saijiuti, kai Kolteņš raunās iz prīšku.

Ar Kolteņu var sarunuot drūšu tikšonu sātā sevkurūs laika apstuokļūs. Bet puorgaļveibys jis nasakautrej puorvuiceit. Pi laika i ceļa apstuokļu natbylstūšys uotruma izvielis, uzmess breidynuojuma “sauleitis” taišni tymā šaļtī, kod nav cytu satiksmis dalinīku… Sorgojīs pats i Dīveņš sorguos!

A niu Kolteņš ir gotovs jaunim pīdzeivuojumim i izaicynuojumim cyta saiminīka vadeibā. Ka paspēsim vīnuotīs leidz nuokamuo mieneša 3. datumam, byus īspieja pošam izbraukt i aizvyzynuot, kur vajag. Vieļuok nabyus dereigu dokumentu, kab pīsadaleitu satiksmē.

Kai saceit juosoka – cena runojama! Suokuma cena… Kurš sūlej vaira?! Lyugums atsasaukt ļauds ar rodūšom i interesnom, eistynojamom idejom i plānim Kolteņa jaunajim pīdzeivuojumim!

—–

Voi nabyus par personeigu? Varbyut par glupu voi provocejūšu, par latgalisku? Moš vajadzēja baļtiski?

Papeirs pacīš daudzi, a škārsteiklys vysu! Redz, kur pūga “publicēt”. Labi, ka itymā sludynuojumu portalā nav komentiešonys īspieju. Eistyni sovejī saprass, a cytu navajag. Kolteņš ir sovejais, juoatrūn jam eistais i vyslobuokais variants. Raudzeits nav pagaisynuots! Niu, Kolteņ, gaideisim.


Print Friendly, PDF & Email

Kalenders

Mar
1
Pīk
all-day Izstuode “Latgales līgavas pūra ... @ Vīneibys noma Tradiceju sāta
Izstuode “Latgales līgavas pūra ... @ Vīneibys noma Tradiceju sāta
Mar 1 all-day
Izstuodē apsaverami folkloristis Intys Viļumys apkūpuotī prīškmati, kas rakstureigi 19. g. s. Vydslatgolys jaunivis pyuram. Nu jaunivis vaiņuka leidz pat dečam. Izstuode apsaverama kotru dorba dīnu nu 11.00 stuņžu, īprīšk sasazynojūt ar Tradiceju sātys puorstuovim[...]
19:00 Grupys “Galaktika” albuma prezen... @ Slampis kulturys piļs
Grupys “Galaktika” albuma prezen... @ Slampis kulturys piļs
Mar 1 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]
19:00 Večerinka @ Gertrudis īlys teatris
Večerinka @ Gertrudis īlys teatris
Mar 1 @ 19:00 – 21:00
“Grodi” muzicēs i aicynuos doncuot vysus – muocātuojus i namuocātuojus, vacus i jaunus, garus i eisus. Spielēs mozuok i vaira zynomus Latgolys daņčus, rūtalis, dzīsmis. Vokora daņču meistars i sūļa īruodeituojs – Jevgenijs Mickēvičs.  [...]