Rokstu sagataveja: portals lakuga.lv

Goda beiguos, 28. decembrī, Namaterialuos kulturys montuojuma centrs “Upīte” aicynoj iz dzejnīka, nūvodpietnīka, publicista i sabīdryskuo darbinīka Ontona Slišāna 75 godu dzimšonys dīnys svieteišonu, informej centra vadeituojs Andris Slišāns. Ontons Slišāns myužeibā nūguoja 2010. godā, bet juo pīmiņa vysā Latgolā teik vys vēļ aktivi uzturāta. Itūgod O. Slišāna dzimšonys dīna tiks atzeimuota ar juo unuku radeitū spēli “O’Gurči”.

Latgolys dzejnīks, rakstnīks, publicists, folklorys vuociejs, nūvodpietnīks i sabīdryskais darbinīks Ontons Slišāns dzims 1948. gods 28. decembrī niulejuo Bolvu nūvoda Škilbānu pogosta Stabļovā. Myužeibā nūguojs 2010. gods 15. decembrī. Bez O. Slišāna padareituo itūšaļt nav īdūmojama “Upītis kulturtelpa” i Zīmeļlatgolys kulturviesture – vuocs i pīrakstejs Zīmeļlatgolys folkloru, dybynuojs i vadejs Upītis i Rekovys etnografiskūs ansambļus. Ontona Slišāna dzejūli izdūti vaira nakai 30 gruomotuos. Nazkod jis beja vīneigais dzejnīks Latvejā, kurs rakstejs i izdevs dzejis gruomotys bārnim latgaliski. Vadejs Upītis biblioteku, sataisejs i vadejs Upītis kulturviesturis muzeju, īdzeivynuojs pasaulī vacuokū festivalu – latgalīšu meilys aiļu i dzīšmu festivalu “Upītes Uobeļduorzs”. Itūšaļt Ontona dorbus turpynoj kai juo bārni, tai unuki, 2014. godā par aktivitatem sajemūt ari apbolvuojumu “Laiks Ziedonim”. Pasasokūt Ontona Slišāna nasavteigajam dorbam i auglim, kū tys ir ness, 2018. godā “Upītis kulturtelpa” tyka īkļauta Latvejis Nacionalajā namaterialuos kulturys montuojuma sarokstā.

Ontona Slišāna jubilejis goda #OntonamSlišānam75 svieteišona suocēs ituo gods janvarī, kod tyka atjaunuotys, īskaņuotys i publicātys Ontona Slišāna stuosteituos puorsokys, kuruos īrunuoja vairuoki zynomi Latvejis muokslinīki – Renārs Kaupers, Juoņs Krūņs, Kristaps Rasims, Ilga Šuplinska i cyti. Turpynuojuos ar Ontona dīnys pasuokumu “Ontona dīnas ļustes”, kura laikā tyka nūorganizāts pyrmais latgaliskuos golda spēlis “Čipierkstneits” čempionats. Pasuokumu cyklys turpynuojuos ar rodūšūs dorbu konkursu Latgolys školom, kas veļteits Ontonam Slišānam, kurā pīsadaleja vairuoki symti školānu nu vysys Latgolys. Rudiņs nabeja īdūmojams bez dzejis dīnu pasuokuma “Upītes Uobeļduorzs”, kura šyupeli jau tuolajā 2002. godā īkuore Ontons Slišāns.

28. decembrī, svietejūt izcyluo nūvadnīka Ontona Slišāna 75 godu jubileju, Bolvu nūvoda Namaterialuos kulturys montuojuma centrs “Upīte” aicynoj apmeklēt Ontona unuku Jēkaba, Helēnys i Mikeļa radeitū i ari pošu vadeitū spēli. Juodasoka, ka unuki ir 11 i 13 godus jauni. Spēle byus jautra, izklaidejūša i tymā pat laikā izzynojūša. Spēle nūtiks Namaterialuos kulturys montuojuma centra “Upīte” ūtrajā stuovā i tei suoksīs 18.00 stuņdēs. Spēlis laikā – reklamys pauzēs – varēs baudeit folklorys kūpys “Upīte” i grupys “Kei-Rei” muzykalūs prīšknasumus. Bet piec spēlis 21.00 stuņdēs pyrmuo stuova zālē vysi aicynuoti pīsadaleit karnevalā, kur juoīsarūn ar pošu taiseitom maskom. Lobuokuos i atraktivuokuos maskys pušnaktī tiks apbolvuotys, bet vysi kūpā varēs atsapyust grupys “Staiguļi” spālātuos muzykys ritmūs.