Informacejis īvade i papyldynuošona datu bāzē “Latgales dati” turpynojās kasdīnā

Informacejis īvade i papyldynuošona datu bāzē “Latgales dati” turpynojās kasdīnā

Rokstu sagataveja: portals lakuga.lv

Sevkuram interesentam ir vareiba škārsteiklā apmeklēt sātyslopu latgalesdati.du.lv i raudzeit atrast informaceju par myusu laiku i viesturiskom personeibom, svareigom nūtikšonom, kai ari dazynuot, kas svareigs nūtics konkretajā datumā. Datu bāze “Latgales dati” ir plotuokais taida veida apkūpuojums, veļteits taišni Latgolys regionam.

Ir paguojs kaids laiks, kai latgalīšu kulturys ziņu portalā tyka publicāta interveja ar datu bāzis “Latgales dati” idejis autoru, Daugovpiļs Universitatis profesoru Henrihu Somu (interveju skaiti ITE), deļtam itūreiz raudzejom dazynuot, kai datu bāze, kurys aizsuokums meklejams 1993. godā, laika gaitā ir puorsamejuse.

Kai skaidroj Henrihs Soms, fundamentalu izmaiņu datu bāzis strukturā nav, jo par svareiguokū vys vēļ teik skaiteita jaunys i originalys informacejis īvade. Teik dūmuots par jau izkruotuos informacejis apstruodi i publiciešonu. “Itam nūlyukam datu bāzis suokuma lopā ir sataiseita jauna sadaļa “Aktuālas tēmas”, kurys rūnās sakarā ar kaidys problemys voi nūtikšonys aktualizaceju kai zynuotnyskā jūmā (konferencis, simpozeji, seminari, lekcejis i cyti), tai ari sabīdryski politiskajā jūmā (geopolitiskuos nūtikšonys). Temu veiduošonā svareiga lūma ir zynuotnyskajai sadarbeibai ar viesturis, eipaši Latgolys pietnīkim,” stuosta H. Soms. Jis ari pastreipoj vairuokys temys, par kurom daīmamuo informaceja ir kvalitativā apjūmā, pīmāram, “Dzīšmu svātku tradiceja Latgolā”, “Latgolys vacticeibnīki”, taipoš ir temys, kurys ir veiduojušuos sadarbeibā ar masu medejim, pīmāram, “Ielas garumā (Daugavas un Lielā iela)”, eipašu aktualitati ir dabuojušys ar geopolitiku saisteitys temys, pīmāram, “Apbediejumi Dubrovina parkā Daugovpilī“, “Ukrainys tema Latgolys informativajā telpā: viesturiskuos dimesejis i myusu dīnys.” Taipoš ir ari temys, kuru pietnīceiba aizasuokuse saleidzynūši naseņ, tok tūs publiskuošona paleidz dasaisteit papyldu interesentus i dabuot jaunu informaceju, par pīmāru – “Seši bruoli tautys muzykanti nu Kolupa”.

Intensivs dorbs nūteik ari pi “Latgales datu” kalendara sadalis “Šī diena Latgalē”, tys īdaleits vairuokūs vierzīņūs: pa pyrmam, sekojūt aktualajai informacejai masu medejūs i socialajūs teiklūs, taipoš datu bāzis redaktors regulari sajam informaceju nu kolegu i Latgolys viesturis interesentu ar nūruodem par jaunuokajom publikacejom ap Latgolu; pa ūtram, sadaļa “Šī diena Latgalē” teik regulari puorveiduota, asūšajā informacejā teik veikti lobuojumi i papyldynuojumi; pa trešam, jauna informaceja teik atrosta, gatavejūt i vodūt lekcejis Daugovpiļs Universitatē, rokstūt zynuotnyskuos publikacejis i gatavejūt prezentacejis vysaiduokim pasuokumim; i, pa catūrtam, eipaši vierteiga ir sadarbeiba ar Daugovpiļs Universitatis viesturis bakalaura i magistru studentim, kai ari doktorantim, jo jūs zynuotnyskī dorbi pamatā veļteiti regiona viesturis izpietei. Studenti snādz vierteigu informaceju, eipaši agruok napublicātu, kura teik dabuota, meklejūt arhivu fondūs.

Jaunu datu īvadis rezuļtatā datu bāzē “Latgales dati” publicātūs personu skaits ir puorsnēdzs 12 tyukstūšys, fiksātys gondreiž ostonis tyukstūšys nūtikšonu, vaira nakai ostonis tyukstūšys fotografeju. Byutyska nūzeime ir atsaucem iz informacejis olūtim, kas ir obligats nūsacejums zynuotnyskajā pietnīceibā. Datu bāzis bibliografejis sarokstu veidoj vaira nakai 17 tyukstūšys vīneibu, iz kuru veiduotys vaira nakai 20 tyukstūšys atsauču.

Datu bāzē ir ari sadaļa “Studeju materiali” (daīmama ITE), kur teik publicāti digitalī resursi – zynuotnyskuos publikacejis par Latgolys regiona pietnīceibu. Tuos ir veiduojuši Daugovpiļs Universitatis pasnīdzieji i zynuotnīki. Taipoš ari sadaļā “Virtuālā Latgale” (daīmama ITE), teik publicāti Daugovpiļs Universitatis zynuotnīku pietejumi.


Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]