Rokstu sagataveja: portals lakuga.lv

Ondrupinis lauku sāta 14. janvarī nu 11.00 da 14.00 stuņžu aicynoj saimis ar bārnim iz tematisku kūpā byušonys aktivitati par godalaikim i godskuortu svieteišonu. Nūtikšona byus pīmāruota pyrmsškolys vacuma bārnim. Pyrmuos sasatikšonys tema – zīma. Īīšonys moksa – kaids gastiņcs pi čaja sev i draugam.

Ondrupinis lauku sāta ir vīta ar eipašu stuostu, kur vēļ pyrma 25 godu beja tik mežs, vys tuo laika pogosta padūme 1999. godā pījāme drūsmeigu lāmumu – ceļt muzeju. Suokumā bejuši tik pīci kuormi – dzeivojamuo sāta i kliets puorvastys, klāvs, reja i pierts – izcalti nu jauna. Laika gaitā izcalta ari kaļve aba smēde, reja puortaiseita par konferenču zāli. Pi klāva, kur ir darbinīku telpys, dacalta pībyuve i sataiseita vyrtuve, kurā apmaklātuojim piec pasyutejuma teik pīduovuoti tradicionalī latgalīšu iedīni, kai kļockys, guļbešnīki, kugeļs i cyti. Lela nūtikšona beja pūdnīka darbneicys ar cepli izceļšona. Vysi kuormi īsuokumā beja tukši, prīškmatus muzejam laika gaitā duovuojuši apleicīnis dzeivuotuoji. Niu ar kruojuma daudzveideibu var īpasazeit sevkurs apmaklātuojs – praktiski vysi tuo prīškmati radzami ekspozicejuos, kas taiseitys kai atvārtais kruojums. Vaira par Ondrupinis muzeja duorgumim skaiti ITE.

Nu ituo gods janvara Ondrupinis lauku sātā iz pusslūdzi kai muzeja nūvodpietneica dorbu suokuse keramike Evija Maļkeviča-Grundele, kurai ir gona daudz ideju vysaiduokom aktivitatem kai saimem ar bārnim, tai i apmaklātuoju grupom. Vystik Evija pīzeist, ka nu suoku grybātu mīreigi i bez steigys paraudzeit, saprast kai lobuok struoduot i kū pīduovuot.

Pyrmuo nūtikšona gaidoma 14. janvarī – saimis ar bārnim teik aicynuotys iz tematisku kūpā byušonys aktivitati par godalaikim i godskuortu svieteišonu. Cikom kas teik plānuots, ka taida veida saīšonys varātu nūtikt reizi mienesī. Vēļ zynuošonai – pi muzeja ir lels kolns, kurs kai reize byus pīmāruots zīmys prīcu baudeišonai, deļtam drūsai var jimt leidza vysaida veida šliucamreikus i papyldu cymdus.

Daleibu pasuokumā lyugums dasaceit pa teleponu 26187266! Īīšonys moksa – kaids gastiņcs sev i draugam.