Rokstu sagataveja: portals lakuga.lv

Janvara suokuos publicāta jauna Latgolys teiciejis Domicellys Līpenis sovulaik dzīduotuos dzīsmis “Zīmeņa” verseja. Tuos autoris ir Liene Skrebinska, Anna Patrīcija Karele, Katrīna Karele i Juoņs Juotnīks (Jātnieks).

Jaunuo dzīsmis “Zīmeņa” verseja tapuse, sasadorbojūt dzīduotuojim i muzikim Lienei Skrebinskai, Annai Patrīcijai Karelei, Katrīnai Karelei i Juoņam Juotnīkam (Jātnieks). Tradicionaluos muzykys dzīduotuoja i izpiļdeituoja, ari muzykys grupys “SABIA” dalineica Liene Skrebinska par pošu dzīsmi i teicieju soka tai: “Domicella Līpeņa ir cīši sirsneiga i patīsa, unikala teicieja. Sovuos teiktajuos dzīsmēs jei izmontoj cīši daudz ornamentu i rūtuojumu, tūs var klauseitīs, pieteit i nu tuo smeļt vuiceibu i īdviesmi. Ar muosom Karelem es īpasazynu caur folkloru i vysaidim pasuokumim – niu itei draudzeiba turpynojās ari muzykā i dzīsmis īrokstā. “Zīmeņa” ir stuosts i vieliejums dzeivuot bez klaidu sovuos dzeivis izvēlēs, i tys mums i vysim cylvākim ir aktuali.”

Dzīsmis īrokstā skaņ Juoņa Juotnīka, Lienis Skrebinskys, Katrīnys Karelis i Annys Patrīcijis Karelis bolsi, Lienis spālātuo kūkle i dūdys, Annys i Katrīnys vejūlis, kai ari ar kontrabasa spēli tolkā guojs Aleksandrs Maļkevičs. Dzīsme īraksteita Rēzeknē Eināra Lipska skaņu studejā i Reigā, studejā “Lauska”. Dzīsmi miksiejs Ravneet Singh.

Domicella Līpeņa (Domicela Līpeņš, 1901–1992) ir Latgolys teicieja, kurys dzīduotuos dzīsmis skaniejušys vairuoku myusu dīnu muziku, folklorys kūpu i grupu izpiļdejumā. Dzīsmi “Zīmeņa” sovulaik dzīduojuši ari postfolklorys grupa “Rikši”, folklorys kūpa “Sudobri”, folklorys kūpa “Ceidari” i dzīsminīks Kārlis Kazāks. Vaira par teicieju Domicellu i juos dzīsmem, kai ari dzīsmi “Zīmeņa” var dazynuot Latvejis Radejis Latgolys studejis raidejuma “Kolnasāta” rubrikā “Dzīšmu stuosti” ITE.