Latgolys sabīdryskuos organizacejis īsastuoj par Varakļuonu nūvoda saglobuošonu

Latgolys sabīdryskuos organizacejis īsastuoj par Varakļuonu nūvoda saglobuošonu

Rokstu sagataveja: portals lakuga.lv

Bīdreiba “Latgolys Saeima” nūsyutejuse viestuli Vidis aizsardzeibys i regionaluos atteisteibys ministrei Ingai Bērziņai, aicynojūt navierzeit grūzejumus “Administrativūs teritoreju i apdzeivuotūs vītu lykumā”, kas paradz Varakļuonu nūvodu leidz ar pošvaļdeibu vieliešonom 2025. godā davīnuot Modūnis nūvodam, informej bīdreibys puorstuovi. Sovpus Latgolys kongresa lāmumu izpiļdis padūme (LKLIP) nūsyutejuse leidzeigu viestuli vaļsts augstuokajom amatpersonom i Saeimys frakcejom.

Viestulē, kuru parakstejuši bīdreibys bīdri, jūs vydā vairuoku Latgolys pošvaļdeibu i Saeimys deputati, nūruodeits, ka Varakļuonu nūvoda unikalū kulturvidi vyslobuok saglobuot i atteisteit, saglobojūt Varakļuonu nūvodu, tam davīnojūt Dekšuoru pogostu, kai ari izviertēt vairuoku cytu pīguļūšūs pogostu davīnuošonu, veidojūt konkurētspiejeigu nūvodu i nūsokūt par atteisteibys centru Varakļuonu piļsātu.

Bīdreiba “Latgolys Saeima” skaita, ka veicūt reformu, ir dūtys vysys vareibys viesturiskūs klaidu izlobuošonai i Latvejis nūvodu regionaluos identitatis styprynuošonai.

Latgolys kongresa lāmumu izpiļdis padūme viestulē, kas adresāta vaļsts augstuokajom amatpersonom i Saeimys frakcejom aicynoj vaicuojumu par Varakļuonu nūvoda vītu Latvejis administrativi teritorialuo īdalejuma strukturuos vērtīs viesturiskuo taisneiguma i Satversmē nūsaceitūs vaļsts pamatvierteibu kontekstā.

Viestulē pastreipuots, ka padūmu okupacejis režims izjauce Latvejis administrativū īdalejumu, kas atbylda Satversmei, graunūt dzeivuotuoju pīdareibys izjiutu sovai kulturviesturiskajai zemei, leidz ar tū ari graunūt Latvejis pamatus. Viesturiskais Varakļuonu pogosts tyka saškalts, tuo vīnu daļu ar Varakļuonu piļsātu davīnojūt Modūnis rajonam, ūtru daļu (myusu dīnu Dekšuoru pogostu) – Rēzeknis rajonam.

Varakļuonu nūvoda davīnuošona Modūnis nūvodam byutu pretrunā Satversmis i Latvīšu viesturiskūs zemu lykuma normom. LKLIP naizpratni roda, tys, ka konsultativa dzeivuotuoju aptauja, kurā pīsadalejuši napylni 34% bolsstīseigūs palīk svareiguoka par lykumu i ari Satversmi. Saeimai i Ministru kabinetam juostruodoj, kab vierzeitu sabīdreibys kūpumam nūzeimeigus procesus, īvārojūt vaļstiskuma principu. I itymā gadīnī ir skaidri radzams, ka Latgolys interesis i puorstuovnīceiba vaļsts puorvaļdē vēļ vaira sasamazynuos.

Kai nūruoda Latgolys kongresa lāmumu izpiļdis padūmis prīšksādātuojs Agris Bitāns, Varakļuonu nūvods ir vīneiguo pošvaļdeiba, kas simtprocenteigai teritoriali ir Latgolys viesturiskuos zemis daļa, tok īkļauta Vydzemis plānuošonys regionā, Vydzemis vieliešonu apgobolā, Vydzemis statistikys regionā i tt.. Varakļuonu nūvoda davīnuošona Modūnis nūvodam byutu pretrunā Satversmis i Latvīšu viesturiskūs zemu lykuma normom.

Īvārojūt īprīšk pīmynātūs apstuokļus i tū, ka poša Varakļuonu nūvoda kūpīna ir cīši polariziejusēs vaicuojumā par davīnuošonu Modūnis voi Rēzeknis nūvodam, LKLIP aicynoj izviertēt vareibu pamest Varakļuonu nūvodu kai atsevišku pošvaļdeibu.


Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]