Rokstu sagataveja: portals lakuga.lv

8. februarī Latgolys viestnīceibys “Gors” Lelajā zālē jau ūtrū reizi nūtiks MIKC “Latgolys Muzykys i muokslys vydsškola” (LMMV) reikuotais Storptautyskais etnodžeza muzykys ansambļu konkurss “Guoyu pa JAZZ”, informej organizatoru puorstuove Ilze Unzule. Itūgod tymā kūpā puļcēsīs jaunī muziki nu Baļtejis vaļstu. Konkursa dīna tiks nūslāgta ar eipašu džema seseju “Pieci džezā”, kurā tiks svieteita MIKC LMMV Džeza nūdalis pīcu godu jubileja.

“Guoyu pa JAZZ” golvonais mierkis ir namaineigs – sova regiona tradicionalūs vierteibu izceļšona i tautys muzykys elementu īkļaušona myusu dīnu muzykys žanrā. Organizatori ar itū konkursu grib sekmēt jaunūs muziku profesionalū izaugsmi, personys vyspuseigu atteisteibu, pylnveiduot muzykys izgleiteibys īstuožu audziekņu kolektivuos uzastuošonys prasmi i pīredzi, atteisteit instrumentalū i vokali instrumentalū ansambļu muziciešonys tradicejis i kvalitati myusu dīnu ritma i tradicionaluos muzykys stylūs.

Kūpumā konkursā pīsadaleis deveni ansambli nu Latvejis, Leitovys i Igaunejis izgleiteibys īstuožu: “Sābri” i “Bruoli i Muosys” nu MIKC “Latgolys Muzykys i muokslys vydsškola”, “Yauda” nu MIKC “Ventspiļs Muzykys vydsškola”, “Meža eži” nu MIKC NMV “Reigys Dūma kora škola”, “ŠšŠšŠ” i “Tranes’s Resolution” nu MIKC “Līpuojis Muzykys, muokslys i dizaina vydsškola”, “La’art” nu Alfrēda Kalniņa Cāsu muzykys vydsškolys, ansamblis no Leitovys Balys Dvarionas Muzykys školys, kai ari “Heino Elleri Muusikakooli pärimusmuusika osakonna viiulikvartett” nu Heino Elleri Muzykys koledžys Igaunejā.

Daleibai pīsaceitī ansambli atskaņuos divejus dažaida rakstura skaņdorbus: sova apvyda tautysdzīsmi originalaranžiejumā i breivys izvēlis skaņdorba originalaranžiejumu voi originalkompoziceju, kas īkļaun etniskuos muzykys elementus. Daleibnīku muzykalū snāgumu viertēs storptautyska aktivu muziku žureja: saksofonists, komponists, saksofona spēlis pedagogs Tuoms Rudzinskis, etnomuzikologs, muziks Ēriks Zeps, etnomuzikologe, flautiste i pedagoge Katarīna Tirmaste (Igauneja), kai ari kontrabasists, vejūļnīks, etno i džeza muzykys puorstuovs Roberts Alans Makijs (Kanada).

Konkursa atkluošona nūtiks 8. februarī Latgolys viestnīceibys “Gors” Lelajā zālē 14.00 stuņdēs. Organizatori aicynoj sevkuru interesentu pasuokumu kluotīnē apmeklēt bez īīšonys moksys. Pasasokūt sadarbeibai ar MIKC “Ventspiļs Muzykys vydsškola”, konkurss tiks straumāts platformā YouTube i školys Facebook lopā. Piec konkursa vysi daleibnīki, pedagogi i džeza muzykys cīneituoji 19.30 stuņdēs tiks aicynuoti iz “IGGI bārs & karbonādes”, kur ar eipašu džema seseju (jam session) “Pieci džezā” tiks svieteita MIKC LMMV Džeza nūdalis pīcu godu jubileja.