Sasatikšonys svātki ar sarunom i muzyku – martā Upītē gasteis grupa “Bez PVN”

Sasatikšonys svātki ar sarunom i muzyku – martā Upītē gasteis grupa “Bez PVN”

Rokstu sagataveja: portals lakuga.lv

Sastdiņ, 9. martā, Bolvu nūvoda Namaterialuos kulturys montuojuma centrā “Upītē” gasteis grupa “Bez PVN”. Kai portalam lakuga.lv atkluoj grupys muzikis Kristaps Rasims, tod itys byus na cik daudzi klasiskys koncerts, cik sasatikšona ar svātku sajiutu.

Pādejūs godūs vīni nu zynomuokūs i popularuokūs Latgolys muziķu – grupa “Bez PVN” – nav nu tūs muokslinīku, kurim byutu rakstureiga aktiva koncertdarbeiba. Kristaps Rasims soka, ka tys aiz tuo, ka grupa niu vaira pīsatur pi principa, lai kotrys koncerts pošim ir ar svātku sajiutu. “Maņ ruodīs, ka nikur cytur pasaulī mes naasam tik daudzi spieliejuši kai Upītē! Tok niu ir laiki, kod jau seņ naasam variejuši tikt iz festivalu “Upītes Uobeļduorzs”, deļtuo itūreiz Andris (Namaterialuos kulturys montuojuma centra “Upīte” direktors Andris Slišāns – red.) jau aiz laiku uzrunuoja, aicynojūt nazkū martā saorganizēt, i mes atsasaucem. Nanūlīdzams faktors ir Andra i vyspuor Slišānu jiegšona sarunuot i pīrunuot. Koč kurā šaļtī vīnkuorši saprūti, ka tev jau ir koncerts Upītē!” nūsasmej Kristaps.

Pārnejā godā grupa “Bez PVN” izdeve albumu “Paraleli horizonti”, kuram veļteiti koncerti izskanēja pavasarī Latgolys viestnīceibā “Gors” Rēzeknē i rudinī koncertzālē “Palladium” Reigā. Pošā goda golā grupa sovus draugus i atbaļsteituojus, svietejūt aizvadeitūs koncertus i reizē sovu dzimšonys dīnu, aicynuoja iz naformalu pasuokumu Kuorsovā, kur ari dzyma ideja piečuok leidzeiga formata nūtikšonai Upītē. “Saīt, ka daudzim interesentim koncertus atsokom deļtuo, ka organizātuoji navar nūdrūsynuot vajadzeiguos skotivis i skanis praseibys, tok itymā gadīnī par reizi vīnuojamīs, ka tys byus akustiskys pasuokums ar sarunom. Jau aiz laika breidynojam klauseituojus, ka tys nabyus “Paralelu horizontu” koncerts, bet vaira taids sasatikšonys formats. Kai daudzi zyna i saprūt, mums šaļtim runuot pateik vaira nakai spēlēt – 70 % myusu mieginuojumu laika paīt runojūt. Namaterialuos kulturys montuojuma centrs “Upīte” ari nav īrosta telpa koncertim, deļtuo i guojom taidā seceibā — “Gors”, “Palladium” i niu asam gotovi Upītei. I tei nav ironeja! Upītē dzeivoj cylvāki-malači,” car jūkim i nūpītneibu koncerta stuostu atkluoj grupys “Bez PVN” muzikis.

9. martā 19 stuņdēs paradzātajā koncertā Upītē kūpā ar “Bez PVN” pīsadaleis ari #FKUpīte, grupys “Kei-Rei” i “Unknown Artist”. Beletus var nūpierkt beletu tierdznīceibys sistemā bezrindas.lv, cena īprīškpuordūšonā 13,00 eiro, nūtikšonys dīnā – 15,00 eiro.

Tikū, 27. janvarī, grupa “Bez PVN” pīsadaleja “Latvejis Radio 2” rokmuzykys i popmuzykys dzīšmu aptaujis finala šovā, skateituoju bolsuojumā dabojūt 6. vītu goda 15 vierteiguokūs dzīšmu topā. Par sovu pīsadaleišonu pasuokumā Kristaps portalam lakuga.lv smejūtīs soka: “Tys, ka mes tykom finala šovā, jau beja puorsteigums. Par reizi pastatejom mierki par 4. vītu, jo uzvarēt var kotrys Dons, tei nabeja myusu gribiešona, bet par catūrtū vītu ir juopasaceinej! Aiz cīna par jūs dorbu i īguļdejumu muzykā tū vītu paduovynuojom “Pruota Vātrai”. Ka nūpītni – lels paļdis vysim bolsuotuojim, tok ir sajiuta, ka i 6. vītu varbyut nabejom peļnejuši. Taida prīca, ka mums ir cik daudzi aktivu atbaļsteituoju – eisūs ziņu raksteituoju!” Reizē vys muzikis nūsoka, ka leluokuo prīca nu itaida pasuokuma kai “Muzykaluos bankys” finala šovs ir sasatikšona ar kolegim – cytim muzikim. Jis ari sacynoj, ka tys, kas šova dīnuos nūtyka Daugovpilī, beja taida kai festivala sajiuta, tok taidom sajiutom na Reigys piļsātuos vajadzātu byut bīžuok. “Ka “Muzykaluo banka” nūteik Daugovpilī voi sevkurs cyts pasuokums nūteik nazkur cytur [na Reigā] – taidai vajadzātu byut normai, na nazkam eipašam, deļtuo prīcynoj, ka mozim sūleišim, bet iz tū īmam,” tai Kristaps Rasims.

Grupā “Bez PVN”, kura 2003. godā rodusēs Kuorsovā, muzicej: Kristaps Rasims (bolss, elektriskuo gitara), Guntis Rasims (bolss, akustiskuo gitara), Juris Vucāns (bolss, elektriskuo gitara, tausteni), Valdis Vucāns (basa gitara) i Normans Bārbals (bungys).


Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]