Viļānūs jau 20. reizi nūtiks Ziņgātuoju i stuostnīku vokors
Rokstu sagataveja: portals lakuga.lv
3. februarī 15.00 stuņdēs Viļānu kulturys nomā nūtiks 20. Ziņgātuoju i stuostnīku vokors, informej pasuokuma organizatori. Jubilejis ziņgē pīsadaleis 20 daleibnīki, kuri izpiļdeis skaistuokuos dzīsmis nu sova repertuara i dzīšmu klažu, kai ari stuosteis jautrus i naparostus stuostus par dzeivi.
Itūgod Viļānūs ziņgēs tautys muzykants Pīters Belinskis (Rēzeknis nūvods, Rogovka), Dekšuoru pogosta veiru kūpa “Kūzuls” (vad. Inga Stafecka, Rēzeknis nūvods), folklorys kūpa “Viļōnīši” (vad. Inga Stafecka, Rēzeknis nūvods), Viļānu krīvu vokalais ansamblis “Sudaruški” (vad. Rita Jegorova, Rēzeknis nūvods), Saļņovys kapela “Sveicynojam, vielejam” (vad. Aija Zeiļuka, Ludzys nūvods), kapela “Malnavas muzikanti” (vad. Kaspars Šakins, Ludzys nūvods), folklorys kūpa “Isnauda” (vad. Ināra Mikijanska-Jakupāne, Ludzys nūvods), Zviergzdinis lauku kapela (vad. Aleksandrs Maļkevičs, Ludzys nūvods), Izvolta vokaluo apvīneiba (vad. Anda Leikuma, Kruoslovys nūvods), Brīžucīma damu muzykaluo apvīneiba “AMMA” (vad. Anita Pakalnīte, Bolvu nūvods), folklorys kūpa “Klāni” (vad. Agnese Solozemniece, Varakļuoni), Murmastīnis folklorys kūpa “Rota” (vad. Teresija Pelša, Varakļuonu nūvods), Borkovys folklorys kūpa “Madava” (vad. Teresija Pelša, Modūnis nūvods), Mārcīnys senioru ziņgu ansamblis “Trizulis” (vad. Ināra Caune, Modūnis nūvods), Casvainis folklorys kūpa “Krauklēnieši” (vad. Baiba Putniņa, Modūnis nūvods), Kūknesis folklorys kūpa “Urgas” (vad. Inguna Žogota, Aizkrauklis nūvods), Puocīma tradiceju kūpa “Draiskās vīgriezes” (vad. Anita Uozuola, Limbažu nūvods), Tautys muzykys kūpa “Sēļu muižas muzikanti” (vad. Iveta Dukaļska, Ugis Vītiņš, Valmīrys nūvods), byus ari stuostneica Una Kukle (Viļāni).
Kai īrosts, ziņgiešona Viļānūs nūsaslēgs ar organizatoru i atbaļsteituoju simpateju bolvom. Taipat byus ari tradicionalais “Balvu jūklis”, kurā pīsadola kotrys kolektivs ar sovu izalaseitu duovonu, i izlūzis veidā cyts cytu apduovynoj, kab vysi daleibnīki justūs kai vyslobuokī.
Pyrmū reizi ziņgātuoju vokors nūtyka 2003. godā Borkovā, bet nu 2011. goda ziņgis i stuosti izskaņ Viļānūs.
Kai stuosta folklorys pietneica Iveta Dukaļska, kura tautys tradiceju saglobuošonu muzykys jūmā pietej jau vaira nakai 30 godu, ziņgis pastuov jau nu 16. godu symta. Tai sauc kai stuostūšuos, garuos tautysdzīsmis, tai ari folkloriziejušuos vuocu i zvīdru dzīsmis. Ka klasiskajuos tautysdzīsmēs golvonais viestejums ir poetisks vyspuorynuojums, tod ziņgis vierteiba ir mozs stuosteņš – kotra ziņge ir kai moza dzeive, kas ļaun īsavērt muižys, lauku voi piļsātys kasdīnā.
