Adeits zirdzeņš, jaunatkluotī piļskolni i galis kiupynuošona – vareiba izbaudeit zīmu Zīmeļlatgolā

Adeits zirdzeņš, jaunatkluotī piļskolni i galis kiupynuošona – vareiba izbaudeit zīmu Zīmeļlatgolā

Rokstu sagataveja: portals lakuga.lv

Jau deveitū godu piec kuortys Bolvu i Ludzys nūvodu turysma specialisti ir sagatavejuši breivdīnu pīduovuojumu vysai saimei “Izbaudi ziemu Ziemeļlatgalē”, kas itūreiz nūtiks 17. i 18. februarī Bolvu, Viļakys, Baļtinovys i Kuorsovys apleicīnēs, viestej Zīmeļlatgolys biznesa i turysma centrs.

Sevkurs interesents teik aicynuots baudeit zīmeigys aktivitatis dobā – dūtīs puorguojīnī iz jaunatkluotajim piļskolnim – Zvonu kolnim, kas atsarūn Svātyunis azara tyvumā, aicynoj Baļtinovys muzejs, sovpus kulturviesturis centrs “Līču mājas” izvess pa mozajom Kuorsovys piļsietenis īleņom, rūnūt atbiļdi iz vaicuojumu “Kur suocās Kuorsova?” Zyrgu sātuos Bolvu nūvoda Tiļžys, Bierzpiļs i Medņovys pogostūs byus vareiba dūtīs izbraucīņūs rogovuos, taipoš ari vyzynuotīs zyrga voi poneja mugorā. Pošim drūsuokajim byus vareiba izbaudeit naaizmierstamu pīdzeivuojumu – Boskuoju skriejīni Brīžucīmā. Sovpus eipašys zīmys šaļtenis vareis baudeit Bierzpilī, kur zyrgu sāta “Jaunbērziņi” gaideis iz zīmeigu pikniku i rodūšom aktivitatem.

Tī, kam pateik gordai paēst, var īplānuot pagasteit sātys restoranā “Dzīles”, kas atsarūn Ludzys nūvoda Malnovys pogostā voi Rekovys dziernovuos, kas atsarūn Bolvu nūvoda Rekovā. “Dzīlēs” saimineica Aina Barsukova gaideis gostus iz syltu čaju, pošcaptu maizeiti, suolejom i soldonom aizkūdom, sovpus Rekovys dziernovuos saimineica Vija Kuļša gaideis iz nasteidzeigu kopeja voi kanipu čaja krušku i blīnim voi gabaleņu pošu capta torta. Gostu sātys “Dīķmalas” saimineica Jolanta Vjakse Baļtinovā pīduovuos sātys veina i korstveina degustacejis, taipoš cīnuos ar jāra galis voi kirbu zupu. Sovpus, ka da šam vēļ nav byuts Bolvu nūvoda Škilbānu pogosta zemnīku saimisteibā “Kotiņi”, tod ir vareiba izmontuot eipašu pīduovuojumu – ekskurseju saimisteibā ar naparostu zupu “Tom Yom” latgalīšu gaumē, pērļu grūbu plovu “Pierļovnīks” “Kotiņu” gaumē i “Kotiņūs” audzātu i kiupynuotu foreli.

Karteņa: Boskuoji Brīžucīmā. Pasuokuma publicitatis materials.

Sovpus drupeit romantiskys nūskanis kūpā ar Latvejā augušim meileibys augim pīduovuos salons “Pelnrušķītes sapnis” Ludzys pusē, cikom pošim mozuokajim breivdīnu baudeituojim salonā byus vareiba redzēt leļu teatri “Patiess stāsts par Čingo Babu, Lielo gliemezi un jūras karaļa bēdām”.

Itymā nedeļgolā gaidoms ari vēļ vīns unikals pīduovuojums – Bolvu nūvoda Susaju pogosta Tepenīcā senejūs lītu kolekcionars i “Cīrulīšu” saiminīks Dzintars Dvinskis pīduovuos vareibu īsavērt galis kiupynuošonys tradicejuos malnajā pierteņā, jo seņuok zīmys soltī mieneši beja laiks, kod lauku sātuos nūtyka cyuku bēris i piečuok galis gataveišona – suoleišona i kiupynuošona. Skaidrs, ka naiztikt bez degustacejis i tikū kiupynuotys galis īguodis.

Gostūs gaideis ari tekstilmuokslineica Annele Slišāne, kura pošā Latvejis pīrūbežā, sovā lauku sātā, aicynoj iz rūtaļlītu – zirdzeņu adeišonu. Lelim i mozim apmaklātuojim ir vārts ari aizadūt iz Bolvu nūvoda muzeju, kur var apsavērt Bolvu piļsātys 96. dzimšonys dīnai veļteitū virtualū izstuodi i Normunda Beržinska saktu i rūtu privatuos kolekcejis izstuodi “Latvijas dārgumi”, taipoš apsaverama ari Latvejis Nacionaluo arhiva izstuode ”Ar barikāžu gaismu sirdīs”.

Pylna breidīnu programa daīmama ITE, taipoš ārtuokai breivdīnu plānuošonai ITE ir daīmama karte ar vysu aktivitašu nūtikšonys vītom. Plānojūt breivdīnys Zīmeļlatgolā, juojam vārā, ka apmekliejums obligati juodasoka īprīšk vītuos, kur tys ir nūruodeits. Sovpus atseviški pasuokumi byus daīmami tik atbylstūšūs laikapstuokļūs.


Print Friendly, PDF & Email

Kalenders

May
24
Pīk
22:05 Raibīs. Pyrma syltī. Zalta tesmi... @ Latvejis Radio 1
Raibīs. Pyrma syltī. Zalta tesmi... @ Latvejis Radio 1
May 24 @ 22:05 – 23:00
Raibīs. Pyrma syltī. Zalta tesmini. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]