Aizvadeits 2. Storptautyskais etnodžeza muzykys ansambļu konkurss “Guoyu pa JAZZ”

Aizvadeits 2. Storptautyskais etnodžeza muzykys ansambļu konkurss “Guoyu pa JAZZ”

Rokstu sagataveja: portals lakuga.lv

8. februarī Latgolys viestnīceibā “Gors” jau ūtrū reizi nūtyka MIKC “Latgolys Muzykys i muokslys vydsškola” (LMMV) organizātais Storptautyskais etnodžeza muzykys ansambļu konkurss “Guoyu pa JAZZ”, kas puļcēja ostoņus jaunūs muziku ansambļus nu vysu treis Baļtejis vaļstu, informej pasuokuma organizatoru puorstuove Evelīna Elksnīte. Konkursa dīna tyka nūslāgta ar eipašu džema seseju “Pieci džezā”, svietejūt MIKC LMMV Džeza nūdalis pastuoviešonys pīktū godskuortu.

“Guoyu pa JAZZ” nav tik konkurss – tei ir skotive, kas sekmej jaunūs muziku profesionalū izaugsmi, snādzūt muzykys izgleiteibys īstuožu audzieknim kolektivuos uzastuošonys pīredzi i vareibu pīruodeit i pylnveiduot sovys vokaluos, instrumentaluos i jaunradis spiejis. Partū pasuokuma aizkulisēs navaļdeja konkurencis, tok storpkulturalys draudzeibys gors – jaunī muokslinīki atzineigai vērtēja vareibu byut kūpā, satikt tik daudzus dzeivys muzykys volūdā runojūšus dūmubīdrus nu vysaidu vītu Latvejā, Leitovā i Igaunejā.

Atbylstūši konkursa nūlykumam ansambli atskaņuoja divejus dažaida rakstura skaņdorbus, kas myusu dīnu ritmūs īkļaun etniskuos muzykys elementus. Daleibnīku muzykalū snāgumu vērtēja storptautyska žureja: Tuoms Rudzinskis, Ēriks Zeps, Katarīna Tirmaste (Igauneja), kai ari Roberts Alans Makijs (Kanada). Žurejis viertiejumā 1. vītu, daleibu meistarklasēs i koncertu apmekliejumu Storptautyskajā improvizacejis, džeza i globaluos muzykys festivalā “Rīgas Ritmi” sajēme MIKC “Līpuojis Muzykys, muokslys i dizaina vydsškola” ansamblis “ŠšŠšŠ”, 2. vītu, kurai bolvā skotivis laiks Storptautyskajā festivalā “Saulkrasti Jazz 2024” i meistara Eduarda Klints taiseituo kūkle, – MIKC “Latgolys Muzykys i muokslys vydsškola” ansamblis “Bruoļi i Muosys”, bet 3. vītu, kurai bolvā Latgolys malnuos keramikys pūdnīku darbneicys “Malny Wylki” puorstuovis Vēsmys Ušpelis taiseitī sviļpaunīki, – MIKC “Ventspiļs Muzykys vydsškola” ansamblis “Yauda”.

Foto: Dagnija Bernāne

Ansambļa “Yauda” daleibnīks Edvards Landmanis sajēme žurejis specbolvu par lobuokū tautysdzīsmis aranžeju, bet Markuss Ābelītis – specbolvu par lobuokū individualū snāgumu sytaminstrumentu spēlē. Žurejis specbolvu par individualū snāgumu tausteņinstrumentu spēlē sajēme MIKC LMMV ansambļa “Sābri” daleibnīks Marts Dreļs; pyušaminstrumentu spēlē – Jēkabs Jānis Reinis nu MIKC NMV “Reigys Dūma kora škola” ansambļa “Meža eži”; vejūlis spēlē – Lisete Anta nu Heino Elleri Muzykys koledžys Igaunejā ansambļa “Heino Elleri Muusikakooli pärimusmuusika osakonna viiulikvartett”. Ansamblis nu Igaunejis dabuoja ari Latgolys viestnīceibys “Gors” simpateju bolvu. Sovpus Lūznovys muižys, kas kai džeza tradiceju Latgolā veicynuotuoji ir konkursa eipašī draugi, simpateju bolvu i daleibu Baļtejis džeza festivala “Škiuņa džezs” meistarklasēs sajēme Jēkabs Jānis Reinis nu ansambļa “Meža eži”.

Piec konkursa tuo daleibnīki, pedagogi i džeza muzykys cīneituoji svieteja regionā vīneiguos Džeza nūdalis pīcgadi, vīnojūtīs eipašā džema sesejā (muzykalā improvizacejā) “Pieci džezā”.


Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]