Latvejis Literaturys goda bolvys 1. kuortys nominantu vydā ari Dagnejis dzejūļu kruojums

Latvejis Literaturys goda bolvys 1. kuortys nominantu vydā ari Dagnejis dzejūļu kruojums

Rokstu sagataveja: portals lakuga.lv

Gatavejūtīs Latvejis Literaturys goda bolvai (LALIGABA), kas itūgod nūtiks ar saukli “Laligaba sabalsojas”, bolvys ekspertu komiseja paziņuojuse nominātūs autorus i dorbu “garū sarokstu”, kai ari nūsaukuse Myuža bolvys sajiemieju – dzejneicu, prozisti i tulkuotuoju Margitu Gūtmani. Nominacejā par spūdruokū debeju īkļauts ari latgalīšu dzejneicys Dagnejis kruojums “Ups, kūki i mes”. 

Latvejis Literaturys goda bolvai izdevieji 2023. godā beja īsnāguši 104 gruomotys – 18 prozys dorbus, 11 dzejis kruojumus, 20 bārnu literaturys dorbus, 38 tulkuojumus, 12 dorbus debejis nominacejā, sovpus pīci dorbi dasaceiti uorpus itūs kategoreju.

Žurejis eksperti pastreipoj, ka “garajā sarokstā” ir tykušys vysvysaidys gruomotys, i kotra nu tūs ir skaitoma par svareigu paguojušuo goda kulturys nūtikšonu. Taipat eksperti grib akcentēt, ka kūpejā Latvejis literaturys ainovā radzami ari augstvierteigi i konkurētspiejeigi dorbi lībīšu i latgalīšu volūdā, i aicynoj skaiteituojus tūs īpazeit.

LALIGABA ekspertu komisejā sūpluok tuos prīšksādātuojai Ievai Melgalvei dorbojās kulturys žurnaliste Undīne Adamaite, dzejnīks, atdzejuotuojs i muziks Pēteris Draguns, literaturzynuotneica i pietneica Madara Āriņa (Eversone), dzejneica i publiciste Ligija Purinaša, rakstnīks Osvalds Zebris, tulkuotuojs, atdzejuotuojs i publicists Ilmārs Zvirgzds.

Nominacejā par spūdruokū debeju 1. kuortā izvierzeits Dagnejis dzejūļu kruojums “Ups, kūki i mes”, Gusta Ābelis gruomota “Pasaulē mīļākais klusums”, Lindys Gabarajevys dzejūļu kruojums “Apļi”, Rutis Kārklinis stuostu kruojums “Ellīgi skaisti noslēpumi”, Dacis Rībenys romans “Dvēseļu gūstā” i Rolanda Virka eisstuostu kruojums “Cilvēki man nepatīk”. Ar pylnu izvierzeitūs dorbu sarokstu var īpasazeit ITE. LALIGABA nominantu eisais saroksts tiks izziņuots marta beiguos.

Dagnejis (aba Dagnejis Dudarjonokys) kruojumā “Ups, kūki i mes” apkūpuoti vaira nakai 70 pādejūs pīcu godu laikā raksteitī dzejūli, kurūs autore kaitojās ar dažaidu volūdu vuordim i simbolim, salīkūt sūpluok jiutu, pruota, piļsātys, lauku, realuos i digitaluos dzeivis paruodeibys i nūtikšonys.

Dagnejis dzejūli ir sižetiski – kai ba runojūt par kasdīnys nūtykumim, autore pīsaskar ari filozofiskim vaicuojumim par laiku, dzeivis jāgu, ari par mīlesteibu pret ūtru cylvāku i dažaidom Latgolys vītom. Kruojumam atlaseitajā dzejūļu kūpā autore rauga raksteit par attīceibom, par kūpeigū i atškireigū piļsātā i laukūs, par cylvāku i juo apleicejuos vidis saisteibu, nasabeistūt lītuot ari myusdīneigus i dažaiduos volūduos raksteitus vuordus. “Itamā gruomotā daudzi stuosti par pošu skaiteituoju stuosta,” tai Dagneja.


Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]