Latgaliska atmosfera i zynuošonu puorbaude latgalīšu olimpiadē Ūzulainis tautys nomā
Rokstu sagataveja: portals lakuga.lv
Rēzeknis nūvoda Ūzulainis tautys nomā 23. februarī nu 18 da 23 stuņžu nūtiks ūtrais “Čangaļu saīts ci latgalīšu olimpiade”, aicynojūt iz prīceigu i gordu laika pavadeišonu latgaliskā atmosferā, viestej organizatoru sagataveituo informaceja.
Ūzulainis tautys noma vadeituoja Santa Ostaša stuosta, ka tei nabyus tipiska olimpiade, jo tamā varēs pasasmīt par nūpītnū, prīcuotīs par byušonu kūpā, izgaršuot latgalīšu iedīņus i baudeit muzyku. Pasuokuma aprokstā teik sūleits, ka byus ari juopakustynoj smedziņu palākuos šyunys, vystik tys byus breivā i vīglā gaisūtnē, baudūt sovus “100 gramus” kulturys.
Kai stuosta Santa Ostaša, pyrmais “čangaļu” saīts nūtyka 2020. gods februarī, kod jai īguojuse pruotā dūma sataiseit kaidu jautru nūtikšonu vysim latgalīšim, kuri reizem prūt pasasmīt poši par sevi i ari partū, ka šod tod kaids jūs nūsauc par “čangalim”. Santa ari dasoka, ka ir nūpītni pasuokumi latgalīšu volūdā, sovpus itū nūtikšonu par eistyn nūpītnu varbyut ari nanūsaukt.
Komandā var byut da 10 cylvāku, i komandu skaits ir īrūbežuots. Komandom ir ari atseviški sātys aizdavumi: juoizdūmoj nūsaukums i sovi “izsaucīni”, taipoš komandom juosagatavej i deļ “saimis” golda leidzam juojam kaids iedīņs, kas, piec jūs dūmu, ir Latgolys kulinaruo montuojuma pamatā. Dasasaceit var da 21. februara pa teleponu 25127340.
