Rotko muzeja pavasara sezonā – ari Latgolys regiona muokslinīku izstuode

Rotko muzeja pavasara sezonā – ari Latgolys regiona muokslinīku izstuode

Rokstu sagataveja: portals lakuga.lv

1. martā ar četrom jaunom Latvejis muokslinīku izstuodem tiks atkluota Rotko muzeja pavasara sezona. Kai informej muzeja puorstuovi, tamā byus apsaverama izstuode “Bastions”, kuru veiduojuse vīna nu Latvejis laikmeteiguos gleznīceibys spūdruokūs muokslineicu – Frančeska Kirke, fotografa i gleznuotuoja Romāna Korovina personalizstuode “Nomirsim kopā”, sešu Latvejis muokslinīku kūpprojekts “ROTHKO. Made in Latvia” piec Dailis teatra izruodis “ROTKHO” motivu, kai ari Latgolys regiona muokslinīku kasgadejuo konkursa izstuode “Lielgabalu klusumā”. Pavasara sezonys izstuodis Rotko muzejā byus apsaveramys da ituo goda 19. maja.

Latgolys regiona muokslinīku kasgadejuo konkursa izstuode “Lielgabalu klusumā” itūgod sajēma 199 dasacejumus. Ar Rotko muzeja žurejis viertiejumu tyka atlaseiti 47 muokslinīki, kas puorstuov vysvysaidus medejus.

Izstuodis kurators Aivars Baranovskis atzineigai viertej muokslinīku aktivū īsaisti i sabīdryskuos dūmys veiduošonu caur muokslu. Ar itū izstuodi Rotko muzejs aicynoj turpynuot radeit i caur muokslu veiduot sabīdreibu, kas ir spiejeiga kritiski izviertēt apleik nūteikūšū kai vītejā, tai globalā leiminī. ““Kod lelgoboli runoj, muzys klusej.” Itei fraze pādejuos desmitgadēs ir pīmynāta puoruok bīži. Puoruok bīži muzom ir bejs juoklusej, juostuov molā, cikom cylvāks dareja, pa jam, svareiguokys lītys. Par laimi, mes dzeivojam taidā ideologiskā godu symtā, kod muokslai vaira nav tik juoapmīrynoj pastuovūšuo režima dekorativuos napīcīšameibys. Kai radzams, sabīdreibuos, kur pastuov itaida muokslinīcyskuo breiveiba, lelgobolu mutis nasataisa vaļā. Tī lelgoboli ir ījāmuši sovu vītu muzeju pogolmūs, bet realuo kara brīsmis napuorkuop ekrana rūbežus,” nūruoda Aivars Baranovskis.

Sasavynūt Daugovpiļs cītūkšņa viesturei i vys vēļ nūteikūšajai karadarbeibai Ukrainā, Frančeskys Kirkis izstuode “Bastions” runoj par muokslineicys aktivū piļsūniskū nūstuoju. Reizē “Bastions” ir ari metafora kotra muokslinīka īškejom ceiņom ar sevi, sovom švuorbom, uzvarom i sakuovem. Izstuodis ideja rodusēs nu kaida eipaša artefakta – “dagūšys lūdis”, kas beja par impulsu jaunajam dorbu cyklam.

Romāna Korovina dorbi Rotko muzejā pyrmū reizi beja apsaverami 2018. godā vairuoku muokslinīku grupys izstuodē “Skatoties ārpus, skatoties iekšpus”. Niu muokslinīks atsagrīž Daugovpilī ar personalizstuodi “Nomirsim kopā”, pīduovojūt skateituojam sovys jaunuokuos, pādejūs godūs radeituos gleznys, telpisku instalaceju i vuordus, kas viestej par dzeivis rytumu i laiku, kai ari gleznīceibys medeju i tuo spieju byut abstraktam.

Atsasaucūt iz Dailis teatra spūdrū izruodi “ROTKHO”, kas tykuse pi atzineibys ari uorpus Latvejis, Rotko muzejā piec īstudiejuma motivu radeita izstuode “ROTKHO. Made in Latvia”. Tamā pīsadalejuši taidi Latvejis gleznīceibys smogsvori kai Frančeska Kirke, Aleksejs Naumovs, Sandra Strēle, Helēna Heinrihsone, Ritums Ivanovs i Kaspars Zariņš. Izstuode izplieš iestudiejuma darbeibu nu teatra da muzeja, nu digitala attāla da tuo atveiduojuma i atveiduotuo originala.


Print Friendly, PDF & Email

Kalenders

Jul
13
Sai
19:00 Koncertizvadums “Atgriežamies La... @ Lejiscīma estrade
Koncertizvadums “Atgriežamies La... @ Lejiscīma estrade
Jul 13 @ 19:00 – 21:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]
22:00 Postfolklorys grupys “Rikši” uza... @ Rotko muzeja pogolms
Postfolklorys grupys “Rikši” uza... @ Rotko muzeja pogolms
Jul 13 @ 22:00 – 23:00
13. julī Daugovpiļs cītūksnī nūtiks 7. storptautyskais viesturyskuos rekonstrukcejis festivals “Dinaburg 1812”. Tū nūslēgs postfolklorys grupys “Rikši” uzastuošona.