Padūtys Latgalīšu kulturys goda bolvys “Boņuks 2023”

Padūtys Latgalīšu kulturys goda bolvys “Boņuks 2023”

Rokstu sagataveja: portals lakuga.lv

Latgolys viestnīceibā “Gors” 2. marta vokorā nūtyka svineiguo Latgalīšu kulturys goda bolvys “Boņuks” padūšonys ceremoneja, kurā tyka gūdynuoti desmit bolvys sajiemieji – spūdruokuos i nūzeimeiguokuos nūtikšonys i personeibys latgalīšu kulturā 2023. godā, kai ari padūta bolva par myuža īguļdejumu ilggadejam Kruoslovys kulturys darbinīkam Jezupam Dobkevičam.

“Boņuka 2023” ceremonejis vadeituoji beja bruoli Kozlovski – Oskars, Jurs, Juoņs i Muorteņš aba Kozmens – vaira zynomi kai humora šova “Četri brāļi” daleibnīki. Skateituojus kluotīnē sveice veiru kors “Graidi”, “Laimas muzykanti”, ansamblis “Sabia”, kapela “Bumburneicys”, “Latgalīšu reps”, “MARYSANA band”, MIKC “Latgolys muzykys i muokslys vydsškola” džeza apvīneiba “Sipisnīks ar madu”, JDK “Austra”, JDK “Dziga” i VPDK “Dzimta”.

“Boņuka 2023“ apbolvuojumu par padareitū 2023. godā sajēme (alfabeta parādā):

Dzīšmuspēle “Trasuns. Fabulas”
Folklorys kūpa “Ceidari” ar albumu “Dzīduotumi, ļustātumi”
Golda spēle latgaliski “Čipierkstneits”
Grupys “Bez PVN” albums “PARALELI HORIZONTI” i prezentacejis koncerti
Inta Pujāta vidis objekti “Oduma meitys”
Komikss bārnim latgaliski “Sunāns breiveibā”
Latgolys karūga apstyprynuošona
Projekts “Bolsu tolka”
Radejis īstudiejums “Bruoli”
Veiru kors “Graidi”

Par myuža īguļdejumu latgalīšu kulturys atteisteibā gūdynuots Kruoslovys kulturys styprais bolsts, ilggadejs kulturys darbinīks, aktivs Kruoslovys Romys katuoļu draudzis i Kruoslovys pūļu bīdreibys dzeivis organizators Jezups Dobkevičs.

Jezupa Dobkeviča dorba myužs ir veļteits dzymtuo Latgolys nūvoda i eipaši Kruoslovys pusis ļaudim. Piec pyrmuos dorba pīredzis Ondrupinis Tautys nomā jis 40 godu (1978–2018) nūstruodoj Kruoslovys pusē – organizejūt, vodūt pasuokumus, ryupejūtīs par Kruoslovys nūvoda muokslinīcyskūs kolektivu kasdīnys vajadzeibom i svātku nūtikšonom, dorūt apjūmeigu, emocionali sarežgeitu i cytim bīži viņ naradzamu dorbu. Kruoslovys nūvods ir vīta, kur Dvina puortūp Daugovā i sveicīņs „Lobs reits” atskaņ daudzuos volūduos – latvyski, latgaliski, pūliski, krīvyski, boltkrīvyski. Byudams pūļs, bīži gastejūt pi muotis bruoļa katuoļu draudzē, īsavuicejs ari latgalīšu volūdu, Jezups ir muocējs atrast kūpeigu volūdu ar vysim, jo skaitejs, ka taišni kultura i muokslys veidoj naradzamus tyltus iz mīru i cīnu sovā vydā. Vysprecizuokī vuordi, kas raksturoj Jezupa byuteibu, ir sirsneigums, laipneiba i mīlesteiba pret cylvākim apleik.

Pasasokūt latgalīšu kulturys ziņu portalam lakuga.lv i Latvejis sabīdryskūs medeju portalam lsm.lv, nu 16. da 29. februara sevkurs grybātuojs varēja bolsuot par sovu simpateju. Itūgod sabīdreiba ir izsprīduse, ka 2023. goda simpatejis bolvys – “Žyks” – sajiemiejs ir Baļtinovys teatris “Palādas”.

Itūgod tyka īsnāgti 106 pretendentu dasacejumi, kurūs izviertēja žurejis komiseja, tuos sastuovā īkļaunūt īprīškejūs godu bolvu sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu daaicynuotūs ekspertus, kuru kasdīna nav saisteita ar latgaliskū kulturu. Pretendentus viertēja piec snāguma kvalitatis, aktivitatis vysa goda laikā, regionā, vaļstī voi plašuokā mārūgā raiseituos rezonansis, latgaliskuma i/voi Latgolys kulturys vierteibu nesšonys, pretendenta ilgtspiejis – ītekmis iz latgaliskuos kulturys procesim iz prīšku.

“Boņuka 2023” nūtikšonu atbolsta Vaļsts kulturkapitala fonda mierkprograma “Latvīšu viesturiskūs zemu atteisteibys programa” i bīdreiba “Latgales reģiona attīstības aģentūra”, kai ari Leivuona, Ludzys, Preiļu, Kruoslovys nūvoda pošvaļdeibys i Rēzeknis piļsātys dūme. Bolvu informativi atbolsta Latvejis Televizeja, Latgalīšu kulturys ziņu portals lakuga.lv, Latvejis Radejis Latgolys studeja i Latvejis Sabīdryskūs medeju portals LSM.lv.


Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]