Rokstu sagataveja: portals lakuga.lv

Par tradiceju Latgalīšu kulturys goda bolvā “Boņuks” palykuse ari publikys simpateju bolvys “Žyks” uzvarātuoja nūskaidruošona. Publikys simpatejis bolsuošonu organizej latgalīšu kulturys ziņu portals lakuga.lv, sasadorbojūt ar portalu LSM.lv. Itūgod leluokū bolsu skaitu sajēme Baļtinovys amaterteatris “Palādas”.

Baļtinovys amaterteatris “Palādas” beja vīns nu 30 Latgalīšu kulturys goda bolvys “Boņuks 2023” nominantu. Amaterteatris, kurs Latvejā cīši labi zynoms ar izruožu “Ontans i Anne” sereju, 2024. godā svietej 25 godu pastuoviešonys jubileju. “Palādas” ir na viņ Bolvu nūvoda, tok i vysys Latgolys vizitkarte. Teatra, kurā ir ap 20 akteru i īsasaistejuši Baļtinovys i Brīžucīma dzeivuotuoji kūpā ar saimem, režisore ir Anita Ločmele aba Danskovīte, kura ir autore vysom amaterteatra lugom. Taišni “Ontans i Anne” sereja sovulaik pīdzeivuojuse garu myužu Latvejis Nacionalajā teatrī kai izruode “Latgola.lv”. Tyvuokajā laikā plānojam pīduovuot interveju ar amaterteatri ari portalā lakuga.lv.

Bolsuojuma uzvarātuojs tyka pi keramikis Vēsmys Ušpelis taiseituos muola statuetis – Žyka, kurā radzams Boņuka suņs Žyks, kurs ari sovulaik plotuok tyka īpazeits car režisora Juoņa Streiča kinu “Cilvāka bērns”, kas baļsteita taida poša nūsaukuma rakstnīka Juoņa Klīdzieja romanā. Statueti i eipašu sveicīni nu latgalīšu kulturys kusteibys “Volūda” i latgalīšu kulturys ziņu portala lakuga.lv – latgalīšu literaturys i Latgolā taiseitūs lobumu kasti – bolvys ceremonejā “Palādom” pasnēdze portala lakuga.lv puorstuovis Amanda Anusāne i Laura Melne. Anita Ločmele, sajemūt bolvu, saceja: “Paļdis, mīlinkī, par jiusu centību, par jiusu dorbu! Mes ešam ļūti prīcīgi, kas mes kuodam pateikam i censsimēs vēļ patikt iz prīšku!” Bolvys padūšonys šaļti video formatā var nūsavērt ITE.

“Žyka” mierkis ir dagrīzt vēļ leluoku sabīdreibys viereibu pārnejā godā latgalīšu kulturā padareitajam i “Boņuka” nominantim. Ka latgalīšu kulturys goda bolvys “Boņuks” laureatus nūsoka žurejis bolsuojums, tod “Žyka” uzvarātuoju gūds ir publikys aktivitatis rūkuos.

Publikys simpateju bolvu “Žyks” Baļtinovys amaterteatris sajēme pyrmū reizi, tok papyldynoj iz Zīmeļlatgolu īprīšk aizceļuojušūs “Žyku” saimi. Pīcuos īprīškejuos bolsuojuma reizēs treis reizis publikys simpateju bolsu sajēme rūkdarbneica, tautystārpu entuziaste i “Latgolys etnografiskuos viestnīceibys” vadeituoja Iveta Seimanova, taipat bolvu sajēmuši ari folklorys kūpa “Upīte” i īrokstu studeja “Bigmaar’s Records”.

Latgalīšu kulturys goda bolvys “Boņuks 2023” ceremoneju vēļreiz var nūsavērt ITE.