Atkuortuotai izdūts Alda Bukša romans “Bruoli”

Atkuortuotai izdūts Alda Bukša romans “Bruoli”

Rokstu sagataveja: portals lakuga.lv

Izdevnīceiba “Dienas grāmata” atkuortuotai izdavuse rakstnīka Alda Bukša kriminalromanu “Bruoli”, kas pyrmūreiz izguoja 2020. godā. Tys eipašs ar tū, ka tyka izdūts obejuos latvīšu volūdys rokstu tradicejuos. Tiraža latgaliski beja īvārojami mozuoka i dreiži palyka par bibliografisku rešumu, niu tei papyldynuota i romans latgaliski otkon daīmams skaiteituojim.

Rakstnīks Aldis Bukšs stuosta, ka atkuortuotu izdavumu vys jau veicynuojs pīprasejums – ari jam daudzi vaicuojuši, kur tod gruomotu latgaliski var nūpierkt. Saleidzynojūt ar romana izdavumu latvīšu literarajā volūdā, latgaliski tam bejuse īvārojami mozuoka tiraža, tok niu tei ir gondreiž divreiz leluoka nakai pyrmūreiz. “Ka pyrmuo tiraža jau ir bibliografisks ratums i vierteiba (pyrmais kriminalromans latgaliski), tod ūtruo tiraža var byut par tuodu pošu vierteibu gruomotu plauktā – pyrmais kriminalromans latgaliski meikstajūs vuokūs,” Aldis nūruoda atškireibu storp pyrmū i atkuortuotū izdavumu – pyrmais beja cītajūs vuokūs, tok niu ir meikstajūs.

Romans “Bruoli/Brāli” ir stuosts par tū, kai naveiksmeiga pokera spēle ekskluzivā Londonys klubā latvīti Edgaru īvalk nūtikšonu kēdē, kas nūvad jū Helsinku cītumā. Pa itū laiku Igaunejā bez viests pagaist Edgara jaunuokais bruoļs. Aizasuoc Edgara pāddziņa gaitys: nu Igaunejis iz Zīmeļlatgolu, Latvejis-Krīvejis pīrūbeža jūslu i Londonu, pa drupeišam izgaismojūt sarežgeitu storptautysku nūzīdzeibys teiklu.

Režisors Viesturs Kairišs kriminalromanu sovulaik raksturuojs kai aizraunūšu i dinamisku, kas paruoda šudiņ aktualū nūzīdzeibys spektru, analizej tuos socialūs īmesļus. “Šaļtim meiluo Zīmeļlatgola atguodynoj bruoļu Koenu “Fargo” ainovu – ar nagaideitom ašņa paļtim iz tikū izkrytušuo snīga. I eipaša mīlesteiba pret Latgolu i latgalīšu volūdu. Koč ari detektivs ir storptautyskys, īkļaunūt Krīvejis i Eiropys kriminaluo pasauļa vaibstus, svareiguokais viestejums ir dūmuots mums pošim:

– Kas tev traucej braukt paceli nu ituo cauruma?

– Kai? Ite ir muna sāta…,” tai par romana golvonū dūmu izasacejs V. Kairišs.

Kriminalromans “Bruoli” beja ari vīns nu Latgalīšu kulturys goda bolvys “Boņuks 2020” laureatu. 2021. godā tys tyka izdūts ari leitovīšu volūdā. Sovpus pārņ pyrmatskaņuojumu Latvejis Radejis 1 eterā pīdzeivuoja “Bruoļu” radejis īstudiejums, kura muokslinīcyskais vadeituojs beja Kristaps Rasims, bet tymā pīsadaleja 25 Latvejis profesionalūs i amaterteatru akteri, kai ari sabīdreibā zynomys personeibys. Tikū ari radejis īstudiejums tyka pi sovys Latgalīšu kulturys goda bolvys “Boņuks 2023”.


Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]