Apreļa beiguos Latgolā nūtiks pasuokums “Satiec savu meistaru!”
Rokstu sagataveja: portals lakuga.lv
Tradicionalais pasuokums “Satiec savu meistaru!” itūgod byus vysa apreļa garumā i kotru nedeļgolu aicynuos interesentus iz kaidu nu latvīšu viesturiskajom zemem i Reigu izzynuot myusu namaterialū kulturys montuojumu meistarklasēs, praktiskuos nūdarbeibuos i lekcejuos, informej Latvejis Nacionaluo kulturys centra puorstuove Lana Kazlauskiene. Latgolā meistarus varēs satikt 27. i 28. aprelī.
Latvejis Nacionaluo kulturys centra, pošvaļdeibu i omotu meistaru kūpeigai reikuotais pasuokums “Satiec savu meistaru!” nūtiks jau 16. reizi, puļcejūt meistarus i jūs “muocekļus” ap 200 nūtikšonu vītuos. Kab sevkurs interesents varātu satikt meistarus vysā Latvejā, pasuokuma nūtikšona itūgod īplānuota vairuokūs nedeļgolūs: 6. i 7. aprelī – Vydzemē, 13. i 14. aprelī – Kūrzemē, 20., 21. aprelī – Reigā, Sielejā i Zemgalē, kai ari 27. i 28. aprelī – Latgolā.
““Satiec savu meistaru!” sešpadsmit godu laikā ir palics par skaistu i stabilu tradiceju. Ir gondarejuma sajiuta par tū, ka daļa omotu meistaru ir uzticeigi pasuokuma daleibnīki gondreiž nu tuo pyrmsuokumu, sovpus turpynuojuma sajiutu roda tys, ka rūnās vys jaunys vītys, daleibnīki i dažaidojās nūtikšonu veidi. Taipat ari itūreiz – nu lekceju, sarunu i diskuseju da praktisku meistardarbneicu,” soka Latvejis Nacionaluo kulturys centra tautys lītiškuos muokslys eksperte Linda Rubena.
27. i 28. aprelī vysaiduokys nūtikšonys gaidomys vysuos Latgolys pusēs. Viļakā varēs vuiceitīs krystdyurīni, Bolvūs – fiļcēt, taiseit vylnys platmalis i pērļuot puļsa siļdeituojus, Zeļčusolā – adeit zirdzeņu, Brīžucīmā – adeit eipašā tehnikā, sovpus Baļtinovā gaideiti vysi, kuri interesejās par tradicionalū muzyku. Vactiļžā nūtiks saļmu dzīduojumi, Tiļžā – lauku iedīņu meistarklase, bet Bierzpilī varēs vuiceitīs taiseit olu. Vysaiduokys omotu prasmis varēs izzynuot ari Ludzā, Ondrupinē i Kruoslovā, ausšonys meistarklase byus Svareņūs, bet cymdu adeišonys – Indrā. Iz Tradiceju sātu Daugovpilī aicynuoti tī, kam interesej kūkliešona, bet Leiksnā gasteis Latgolys etnografiskuo viestnīceiba i Vydsmuižys Annuža. Peišonys meistarklase paradzāta Naujinē, bet taišni skaliņu peišonys – Špogūs. Preiļūs varēs fiļcēt, bet Leivuonā i Veipē – tamburēt.
Informaceju par vysim pasuokuma daleibnīkim var atrast tuo sātyslopā asūšajā kartē. Daleibnīku skaits daudzuos nūtikšonu vītuos ir īrūbežuots, partū pi meistaru juopīsasoka sovlaiceigai.
