Rokstu sagataveja: portals lakuga.lv

“25. – 31. marts ir ituo goda klusuokais laiks – Leluo gavieņa kulminaceja. Latgola, saukta par Muorys zemi, vys vēļ sorgoj katuoliskuos bazneicys tradicejis, partū Klusuos nedelis laikā jius ituos zemis afišuos vystycamuok naredzēsit aicynuojumus iz skalim pasuokumim. Tok ari itymā laikā dreikst i vajag apmeklēt kulturys pasuokumus, palānynojūt gaitu, varbyut vaira asūt vīnuoteibā ar dobu i īsaklausūt Dīva bolsā. I Dīvs ar cylvākim runoj car vysdažaiduokajom lītom,” tai ituos nedelis īsacejumus īvoda varganiste Guna Kise.

Rēzeknis Muokslys noma apsavieršona

Īdvasmojūša varātu byut lāna pastaiga pa Muokslys nomu Rēzeknē, kas ir unikala, kūkgrīzumim boguoteigi rūtuota āka, kas calta eklektikys stilā 19. g. s. pādejā catūrksnī. Naseņ jaunu elpu atgivuse, itei vīta prīcej gostus ar grīstu gleznuojumim, greznom pūdeņu kruosnim, unikalom parketa greidom. Taipat Muokslys nomā var īpazeit ekspoziceju „Latgolys gleznīceiba” nu Latgolys Kulturviesturis muzeja kruojuma i apsavērt Latgolys vacmeistaru (Jakova Beketova, Franciska Varslavāna, Nikolaja Breikša, Stanislava Kreiča, Vitālija Kalvāna i Arvīda Eglis) gleznys, kai ari latgalīšu gleznuotuoju jaunuos paaudzis dorbus (Solvitys Ludboržys, Gundegys Rancānis i cytu). 21. martā Muokslys nomā atkluoja Osvalda Zvejsalnieka pīminis zeimi, kurū ari ir vārts apsavērt.

Socialūs medeju pasauļa īpazeišona

Interesanta i pādejūs godu laikā arviņ aktualuoka jūma ir socialūs medeju pasauļs. Ir svareigi saglobuot skaidru pruotu informacejis uzjimšonā, lai mes nakliutu par ītekmejamim propagandys uperim. Zaļajā catūrtdīnē Daugovpilī gaidoms rūseigs vokors, kur puļcēsīs ituos nūzaris interesenti i specialisti bīdreibys “Cita Daugavpils” organizātajā pasuokumā “ROKAM DZIĻĀK: sociālo mediju darbnīca”. Saistūšys diskusejis, jaunuokuos tendencis, video montažys i apstruodis reiku meistarklase, kai ari muoksleiguo intelekta tema, kuru atkluos Anželika Litvinoviča i Anna Luīze Ruskule. Dasasaceišona darbneicai ITE.

Pastaiga Aglyunys Brīžu duorzā i Svātuo Mise bazilikā

Vysbeidzūt gareigam pīpiļdejumam i mīram labi derēs pastaiga pa Aglyuvys Brīžu duorzu saimis voi draugu lūkā. Saimineicys Inesis Reinis puorraudzeibā ir vaira nakai 30 dambrīžu, kuri apsaverami na tik aiz augsta žūga, tok ari pavysam blokus. Tykuši Aglyunā, jius redzēsit, cik aicynojūši ir diveji smailī, boltī tūrni, kas mirdz gūdeibā, apcerūt Jezus krysta nuovi i gaidūt Dīva dālu izejam nu kopa. Tys ir golvonais i svareiguokais nūtykums kristeigajā pasaulī. Partū esit kūpā ar sovom draudzem voi dūditēs iz Aglyunys baziliku, kur itamā nedeļā tiks izdzeivuoti Evaņgeleja nūtykumi ar kulminaceju 31. martā, kod 8.00 suoksīs Augšamceļšonuos proceseja i Svātuo Mise ar iedīņu pasvieteišonu. Sadarbeibā ar fantastiskajim Aglyunys bazilikys kora dzīduotuojim dirigentis Īvys Lazdānis vadeibā, pi vargaņu byušu es, Guna Kise. Vaira par misem Aglyunā ITE.