Portals lakuga.lv – vīns nu Latvejis medeju volūdys bolvys laureatu

Portals lakuga.lv – vīns nu Latvejis medeju volūdys bolvys laureatu

Rokstu sagataveja: portals lakuga.lv

Pīktdiņ, 22. martā, Rakstnīceibys i muzykys muzeja kulturtelpā “Tintnīca” ar svineigu laureatu apbolvuošonu nūsaslēdze Vaļsts volūdys centra i Nacionaluos elektroniskūs plošsazinis leidzekļu padūmis reikuotuo Latvejis medeju volūdys bolva. Veicynuošonys bolvu par latgalīšu rokstu volūdys normom atbylstūšys i boguotys volūdys lītuojumu sajēme ari portals lakuga.lv.

Latvejis medeju volūdys bolvys mierkis ir na tik cyldynuot medejus i raidejumu vadeituojus, tok ari atguodynuot, ka myusu vaļsts volūdys teireiba i kvalitate ir myusu pošu rūkuos. Akceja ir vīns nu “Vaļsts volūdys politikys pamatnūstuodņu 2021.–2027. godam” pasuokumim, kurs veicynoj medeju i skaiteituoju aktivu īsasaisteišonu volūdys kulturvidis kūpšonā.

Bolva radeita, divejom īstuodem saradzūt kūpeigys interesis i mierkus i apvīnojūt spākus, kas otkon ir pacieļs īprīškejū akceju “Latvīšu volūdys kvalitate periodiskajā presē” jau pavysam cytā kvalitativā leiminī, aptverūt vysu medeju vidi. Jau pārņ portals lakuga.lv sajēme veicynuošonys bolvu akcejā “Latvīšu volūdys kvalitate periodiskajā presē”, kū portala redaktore Laura Melne ari pastreipuoja ari sovā runā, sajamūt bolvu: “Lels paļdis par nūviertiejumu! Mes asam cīši prīceigi, ka jau ūtrū godu piec kuortys latvīšu volūdys bolvā teik nūvārtāts ari portals, kurā teik publicāti roksti tikai i vīneigi latgalīšu rokstu volūdā. Tai ari plašuokai sabīdreibai teik paruodeits, ka latgalīšu rokstu volūda ir nūzeimeiga latvīšu volūdys daļa.”

Taipat par prasmeigu latgalīšu volūdys lītuojumu kasdīnys dorbā Kulturys ministrejis i Rakstnīceibys i muzykys muzeja simpatejis bolvu sajēme Latgolys Regionaluos televizejis žurnaliste Ausma Sprukte-Kozule.

Vysi bolvys laureati. Foto: Vaļsts volūdys centrs

Bolvai beja dasaceiti septeņdesmit seši daleibnīki. Laikrokstu kategorejā III pakuopi pīškeire laikrokstam “Ventas Balss”, žurnalu kategorejā II pakuopi pīškeire žurnalam “Lielais Detektīvs” i III pakuopi – žurnalam “Rīgas Laiks”. Škārsteikla portalu kategorejā I pakuopi pīškeire portalam “Satori.lv” i III pakuopi – portalam “Dance.lv”. Radejis raidejumu vadeituoju kategorejā I pakuopi pīškeire Aritai Grīnbergai, II pakuopi Eduardam Liniņam i III pakuopi – Inesei Vaikulei. Televizejis raidejumu vadeituoju kategorejā I pakuopi pīškeire Arnim Krauzem, II pakuopi Artai Skujai i III pakuopi – Jānim Gestem. Veicynuošonys bolvys dabuoja žurnali “Avenīte” i “Ir”, škārsteikla portali “Lakuga.lv” i “Santa.lv”, radejis raidejumu vadeituoja Signe Krebse, televizejis raidejumu vadeituojs Ilmārs Tīrmanis i audiovizualūs pakolpuojumu piec pīprasejuma raidejumu vadeituoji Andris Auzāns i Olga Dragileva.


Print Friendly, PDF & Email

Kalenders

Jul
12
Pīk
all-day Fotoizstuode “Piecgarša” @ Storptautyskuo lidūsta "Reiga"
Fotoizstuode “Piecgarša” @ Storptautyskuo lidūsta "Reiga"
Jul 12 all-day
Pyrmūdiņ, 17. junī, īzeimejūt Juoņa dīnys nedeļu, Reigys storptautyskajā lidūstā tyka atkluota bīdreibys “Latgolys etnografiskuo viestnīceiba” latvīšu tautystārpim i tymūs apviļktajom mozajom lelem – Annužom – veļteituo fotoizstuode “Piecgarša”. Izstuode Reigā ir starts vasalai streipei[...]
18:00 Daņči @ Veseleibys sola
Daņči @ Veseleibys sola
Jul 12 @ 18:00 – 21:00
Daņči @ Veseleibys sola
18:00 Rēzeknis nūvoda dīnys @ Rēzeknis nūvods
Rēzeknis nūvoda dīnys @ Rēzeknis nūvods
Jul 12 @ 18:00 – Jul 14 @ 23:45
Rēzeknis nūvoda dīnys @ Rēzeknis nūvods