Rokstu sagataveja: portals lakuga.lv

Itūreiz ar pavasareigim īsacejumim pasadola Latgolys Kulturviesturis muzeja muzejpedagoge Renāte Ničiporčika. Koč ari Leldīnis svieteišona jau aizvadeita, Renāte īsoka vys vēļ izbaudeit svātku gaišū i pavasareigū atmosferu, pavodūt laiku kai ar saimi, izgatavejūt putynu būreišus i suvenirus, tai ari baudeit Latgolys muokslys breinumus – gleznīceibu i pūdnīceibu, apmeklejūt Latgolys Kulturviesturis muzeju i Rēzeknis Muokslys nomu.

Apreļs pūdnīceibys zeimē

Latgolys Kuļturviesturis muzejā apreļs parosti ir keramikys zeimē – gatavejomēs kasgadejom Pūdnīku dīnom, nūteik muzejpedagogiskuo programa “Muola pikuča pīdzeivuojumi”, aktualizejam vīnu nu myusu Kulturys kanonā īkļautūs vierteibu – Latgolys pūdnīceibu –, aicynojūt apmeklēt Latgolys Kulturviesturis muzeja ekspoziceju “Muola i guņs radeits breinums”. Ituo gods 3. aprelī 16.00 stuņdēs nūtiks Olgys i Valda Pauliņu keramikys izstuodis “Radeits Latgolā” atkluošona. Izstuode byus apsaverama vysu apreli.

Pavodi sastdīni muzejā saimis lūkā

6. aprelī laikā nu 11.00 leidz 15.00 Latgolys Kulturviesturis muzejā nūtiks Saimis sastdīne, kurys laikā byus putnu būreišu i suveniru izgataveišonys darbneicys. Izgataveitū putnu būreiti saime varēs pajimt leidza i sovam saimis strodam saryupeit sātu. Vysys dīnys garumā saimis ar bārnim varēs, rodūši dorbojūtīs, izgataveit vysaidus Leldīnis i pavasara suvenirus. Muzeja ekspozicejis i izstuodis saimem ar bārnim byus bez moksys.

Atrast pavasari Muokslys nomā

Rēzeknis Muokslys nomā, kulturys jūmys cylvāku sarunuos sauktā par “Skrundu”, apsaverama Latgolys Kulturviesturis muzeja ekspoziceja “Latgolys gleznīceiba” – kai Latgolys vecmeistaru, tai jaunuos paaudzis muokslinīku dorbi. Izstaigojūt Muokslys noma greznuos zālis, atrūnit Vitālija Kalvāna “Pavasara sauli”, Arvīda Eglis “Klusū dobu ar pučem”, Vladimira Serkova “Apreli” i nūteikti īejit Osvalda Zvejsalnieka zālē, pīminit izcylū muokslinīku i apsaverit juo pādejū napabeigtū gleznu “Ave Maria”.