Izsludynuots Rēzeknis nūvoda latgaliskuos identitatis projektu konkurss

Izsludynuots Rēzeknis nūvoda latgaliskuos identitatis projektu konkurss

Rokstu sagataveja: portals lakuga.lv

Kab veicynuotu formys i satura ziņā daudzveideigu projektu realizaceju Rēzeknis nūvodā, kas styprynoj i popularizej latgaliskuos vierteibys i veicynoj latgaliskuos identitatis i pīdareibys izjiutu, pošvaļdeibys Kulturys i turysma puorvaļde izsludynoj i organizej Latgaliskuos identitatis projektu konkursu, viestej informaceja Rēzeknis nūvoda sātyslopā. Konkursa kūpejais daīmamais finansiejums ir 3000 eiro.

Konkursa viersmierkis ir veicynuot latgaliskuos kulturvidis saglobuošonu i atteisteibu Rēzeknis nūvodā i nūdrūsynuot latvīšu volūdys viesturiskuo paveida – latgalīšu volūdys – atteisteibu i styprynuošonu. Finansiali tiks atbaļsteiti projekti, kas formys i satura ziņā styprynoj latgaliskūs kulturys elementu styprynuošonu, populariziešonu (aktivitatis, pasuokumi, spēlis, informativī materiali i c.), kai ari veicynoj pīdareibys izjiutu Latgolys regiona kulturys telpai. Konkursā var pīsadaleit pylngadeigys i reiceibspiejeigys fiziskys i juridiskys personys, kurūs projekta eistynuošonys darbeiba tīši saisteita ar Rēzeknis nūvodu.

Dasasaceit konkursam var da 29. apreļa, projekts juoeistynoj Rēzeknis nūvodā nu 2024. gods 1. juņa da 15. decembra. Dasacejuma veidlopa, kurū var atrast Rēzeknis nūvoda sātyslopā, juoīsnādz, syutūt tū iz elektroniskuo posta adresi ktp@rezeknesnovads.lv, aiznasūt iz Rēzeknis nūvoda pošvaļdeibu voi nūsyutūt ar posta starpnīceibu (adrese: Rēzeknis nūvoda dūme, Atbreivuošonys aleja 95A, Rēzekne, LV-4601) ar nūruodi “Latgaliskuos identitatis projektu konkurss” da 29. apreļa 9.00 stuņžu.

Leidzeigs konkurss Rēzeknis nūvodā tyka izsludynuots pyrma diveju godu. Tymā tyka atbaļsteita vizualuos identitatis i reklamys materialu veiduošona, kurūs lītuota latgalīšu rokstu volūda i simbolika, pīmāram, Nautrānu pogosta vītvuordu karte, laternu stulpu baneri Rogovkā ar uzrokstim latgaliski, sabīdryskūs āku uzroksti latgaliski Drycānūs i cyti.


Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]