Rokstu sagataveja: portals lakuga.lv

Izdūta Daugovpiļs nūvodpietnīka Josifa Ročko gruomota “Holokausts Latgalē: historiogrāfija un atmiņas”, kurā latvīšu i krīvu volūdā apkūpuota i izpieteita historiografeja i atminis par holokaustu Latgolā, nūskaidrojūt puormejis holokausta izpratnē i saleidzynojūt dažaidu nacionalūs školu pietejumus par itū temu, viestej publiski daīmamuo informaceja.

“Gruomota ir par Latgolā nūtykušuo holokausta apjiegšonys i izpietis procesu. Tys ir pyrmais mieginuojums veikt historiografisku pietejumu par itū temu sasaistē ar Latgolys regionu,” atzeimoj izdavuma autors Josifs Ročko. Gruomotys tapšonu finansiali atbaļsteja Daugovpiļs vaļstspiļsātys pošvaļdeiba, Latvejis ebreju kūpīnys restitucejis fonds, bīdreiba “Memory and Help” i muzejs “Ebreji Daugavpilī un Latgalē”.

Josifs Ročko (dzims 1948. godā Daugovpilī) ir školuotuojs, nūvodpietnīks, publicists. Daugovpiļs Universitatis absolvents, pedagogejis, politekonomejis, viesturis magistrs. Daugovpiļs ebreju kūpīnys muzeja dybynuotuojs i direktors, Treju Zvaigžņu ordiņa kavalers. Daudzu rokstu, brošuru, vairuoku gruomotu par ebreju viesturi Latgolā i Daugovpilī autors i leidzautors. Juo tāvs izdzeivuoja Daugovpiļs geto.

Ročko izdūtūs brošuru vydā ir ari ceļveds “Ebreju Latgola” latgalīšu rokstu volūdā (2016), kurū latgaliski puorlics Valentins Lukaševičs. Autora roksti atrūnami ari vairuokūs “Tāvu zemes kalendara” izdavumūs.