Rokstu sagataveja: portals lakuga.lv

Nu 12. apreļa da 30. juņa Reigys Latvīšu bīdreibys nomā byus apsaverama Daugovpiļs regiona muokslinīku asociacejis izstuode “Savienojums”. Tamā apsaveramī dorbi ir muokslinīku viestejums par tū, ka asam vīnuoti dūmuos par myusu vaļsti Latveju, tuos breiveibu, kai ari nūceju par mīru i Ukrainys uzvaru nažieleigajā karā, informej muokslineica Mairita Folkmane.

Izstuodis ideja rodusēs Daugovpilī 2022. godā, kod Daugovpiļs Nūvodpietnīceibys i muokslys muzejā tyka eksponāti Dantes Aligjeri bīdreibys muokslinīku grupys dorbi izstuožu cyklā “Pilsētas Daugavas krastos”, kuru organizēja Reigys Latvīšu bīdreiba. Turpynojūt tū, teik reikuota itei izstuode. Namiteigais iudiņa plyudums ir tys, kas jau godu symtim ilgi savīnoj Latvejis piļsātys caur Daugovpili da Reigys, nasūt leidza prīceigū i skumeigū – jiutys, stuostus, ilgys i nūcejis…

Divdesmit diveju Daugovpiļs muokslinīku divdimenseju ellis, akrila, akvareļgleznīceibys, grafikys i tekstila radeitajūs muokslys dorbūs atsakluoj muokslys izteiksmis veidu daudzveideiba – suocūt nu realistisku da abstraktu rysynuojumu. Sovūs dorbūs daudzi nu muokslinīku –  Ineta Auzāne, Maija Bērziņa, Ivo Folkmanis, Una Gura, Oskars Jansons, Nataļja Krjukova, Lelde Kundziņa, Oļegs Marinoha, Nataļja Marinoha, Anna Silabrama, Aleksandra Šļahova – atainoj dobys skotus i piļsātys ainovys. Sovpus gleznuotuojis Valda Mežbārde, Alina Petkune i Anastasija Dubovska viereibu dagrīž cylvāka īškejuo pasauļa atspīgeļuojumam portreta i figurativajūs rysynuojumūs. Abstraktys kruosu i fakturu mejīdarbeibys rūnamys Romualda Gibovska, Ingūnys Liepys, Ilonys Linartis-Ružys i Dacis Pudānis, Sanri, Mairitys Folkmanis, Viktorijis Valujevys i Oksanys Vronskys dorbūs, kas rūsynoj skateituoju īsasaisteit tūs interpretiešonā. Itei izstuode ir veiduota, tycūt, ka muoksla var veiduot vysstypruokūs savīnuojumus i spieceigus impulsus rodūšai darbeibai, prīcai, vīnuoteibai.

Daugovpiļs muokslinīki nu 1998. gods ir apsavīnuojuši rodūšā organizacejā – bīdreibā “Daugovpiļs regiona muokslinīku asociaceja” (DRMA). Itūšaļt tei apvīnoj vaira par 50 vysaidu paaudžu, školu i nūzaru profesionalūs muokslinīkus: gleznuotuojus, grafikus, tieļnīkus, keramikus, tekstilmuokslinīkus, scenografus, dizainerus i cytus. DRMA golvonī darbeibys vierzīni – veicynuot jaunradei labvieleigus apstuokļus, popularizēt asociacejis bīdru rodūšuo dorba rezultatus, aizstuovēt muokslinīku rodūšū breiveibu, moraluos, ekonomiskuos, socialuos tīseibys i profesionaluos interesis. DRMA organizējuse muokslys izstuodis daudzuos piļsātuos Latvejā i uorzemēs.

Izstuode “Savienojums” radeita, sasadorbojūt Reigys Latvīšu bīdreibai, Daugovpiļs Latvīšu bīdreibai, Daugovpiļs Nūvodpietnīceibys i muokslys muzejam i Daugovpiļs regiona muokslinīku asociacejai.