Rokstu sagataveja: portals lakuga.lv

Izguojs jau ostoitais Cybuļu Jura sastateitais jūku i anekdotu kruojums – “Ai kū saslymi, ai tū juozaārstej”. Itūreiz kūpā ar sastateituoju pi tuo struoduojuši Aizmuorka Berta, Krakopu Zintis i Krapacu Ļuce, bet gruomotys vuoka autors, kai īrosts, ir Slyšanu Prancs.

Jurs Cybuļs da ituo sastatejs i izdevs septeņus jūku i anekdotu kruojumus: “Īdzer veina, lai dzeive ira feina!” (1999), “Īdzer ols, lai bāduom ira gols!” (2015), “Ka dzersi šnabi, moš byus labi!” (2017), “Ka samagonka goldā, to prīca apleik volda!” (2019), “Byusi vasals!” (2020), “Vieļ pa vīnai i da dybuna!” (2021) i “Groznuo kuorta” (2023). Jaunuos gruomotys īvodā jis nūruoda: “Kuo soka, ka toļkin vīna nedele voi jou vasalas septines dīnes atdzartas, to laiks suokt pokmelietīs.” Tok lai ari dzeršonys tema apspālāta vysūs ostoņūs kruojumūs, Cybuļu Jurs naaizmierst dasaceit, ka “dzeršona ira temats, par kuru labi pajūkuot, bet vēļ lobuok byutu, ka tys nikod nivīnam napalyktu par nūpītnu problemu”.

Kruojumā, leidzeigai kai īprīšk, apkūpuoti kai anekdoti, tai gadīni nu dzeivis. Vysu ostoņu gruomotu autoru sastuovs ir bejs atškireigs – kaids daīt kluotyn, cyts vaira napīsadola. “Ai kū saslymi, ai tū juozaārstej” rodūšajā komandā ir vysi treis īprīškejuo kruojuma “Groznuo kuorta” autori – Cybuļu Jurs, Krakopu Zintis i Krapacu Ļuce (Aina Korkla). Jim otkon pīsavīnuojuse ari vīna nu kruojuma “Ka dzersi šnabi, moš byus labi” autorem – Aizmuorka Berta aba Ingrīda Igaune.

Vysuos gruomotuos jūkus var skaiteit kotra autora dzymtajā izlūksnē, na latgalīšu rokstu volūdā. “Kuo rakstiets pyrmuos jūku gruomatas īvodā, bez muotes volūdas cylvaks ira garīgi nabags. Autori roksta kotrs sovā dzymtejā volūdā, tys ira, muotes voi tāva volūdā. Konkreti itumā gadejumā izlūksne teik saglobuota dieļtuo, ka autorīm tuo ira daudzi vīgluok rakstiet, pi tam jūki, anekdotes ira dzierdieti taišni itumā volūdā (izlūksnie),” taidu izvieli pamatoj Jurs Cybuļs.