Rokstu sagataveja: portals lakuga.lv

Škārsteikla žurnals “Satori” aicynoj iz publisku diskuseju par tū, kai veiduot kūpeigu telpu sarunai par Latgolu. Kai informej “Satori” puorstuovs Andrejs Vīksna, diskuseja nūtiks 8. majā 17.00 stuņdēs kulturvītā “Rancāna pogolms” Rēzeknē i turpynoj rokstu i raidīrokstu cyklā “Latgolys vaicuojums” aizsuoktū temu par sprīdzis punktim Latgolys i puorejuos Latvejis attīceibuos.

Saruna par Latgolu mādz īkrist galiejeibuos – voi nu tei ir hierarhiska, kur nūsaceituo Reiga runoj nu “vacuokuo bruoļa” poziceju, voi izslādzūša, kurā nūsaceitajai Reigai vyspuor nav tīseibu sprīst, voi ari obeju pušu stereotipūs baļsteita. Ari tod, ka izadūd izavaireit nu galiejeibu, saruna par Latgolu nūteik piec diveju pušu principa – Latgola i puorejuo Latveja. Voi īspiejams atrast kūpeigu laukumu, kurā saruna par Latgolu ir saruna par mums vysim, par myusu kūpeigū dzeivis telpu i atteisteibys scenarejim? Kas ituos šaļts diskursā byutu juopuormej, kab iz itaidu telpu vierzeitūs?

Diskusejā aicynuoti pīsadaleit redzīņu lideri, kuri par itū vaicuojumu ir dūmuojuši kotrys sovā darbeibys jūmā. Diskuseju vadeis žurnaliste Rita Ruduša, tamā pīsadaleis serejis “Latgolys vaicuojums” redaktore, antropologe Dace Dzenovska, latgalīšu kulturys kusteibys “Volūda” vadeituoja Edeite Laime, aktiviste, dokumentaluos kinys “Daugavpils – iespēju vai nespēju pilsēta?” autore Vladislava Romanova i teatra režisore Marika Čerņavska, kura dzymuse i auguse Zemgalē, tok iz Latgolu puorsacāluse pyrma 10 godu. Runuotuoju saroksts vēļ tiks papyldynuots.

Škārsteikla žurnala “Satori” rokstu i raidīrokstu sereja “Latgolys vaicuojums” pīsavērse vairuokim sprīdzis punktim Latgolys i Latvejis attīceibuos, puordūmojūt i analizejūt tū, kai tī veiduojušīs i veidoj myusu identitati. Serejis redaktore ir antropologe Dace Dzenovska, vysi serejis roksti latvīšu literarajā volūdā skaitomi škārsteikla žurnalā “Satori”, bet latgaliski ari portalā lakuga.lv.