Rokstu sagataveja: Anna Briška

Daugovpilī, Augšdaugovys nūvoda kulturys centrā “Vārpa” itymā pavasarī aizasuoce mandolinys spēlis meistarklasis, kurys vadeja Gintars Andrijausks (Gintaras Andrijauskas) – tradicionalūs instrumentu muzykants nu Leitovys. Aktivuokī meistarklašu dalinīki – Ambeļu folklorys kūpa “Speiga” ari tyka pi vareibys pīsadaleit 31. Storptautyskajā festivalā “Sėlos muzikantai” Zarasu rajonā, Leitovā.

Ituo gods martā i aprelī pavysam nūtyka četrys mandolinys spēlis nūdarbeibys, kod tyka kai vuiceiti spēlis pamati, tai ari spālāti vairuoki goboli, kū izpiļdeit plotuokai publikai. Rezuļtatā folkloras kūpys “Speiga” (Ambeli) i “Dyrbyni” (ANKC “Vārpa”) ar leitovīšu “Pjoviau šieną” i latgalīšu “Zīlānu daņci” izastuoja 20. Storptautyskajā Tautys muzykantu saītā Vabalē 28. aprelī.

Tamā pošā dīnā Skryndu dzymtys muzejā Vabalē beja apsaverama mandolinu izstuode nu Gintara Andrijauska personeiguos kolekcejis. Vysaizraunūšuokuo beja sasatikšona ar pošu muzykantu, kurs vysim izstuosteja kai par mandolinu spēlis tradicejom Leitovā, tai ari par kotru nu sovu instrumentu zynuoja stuosteit iņteresnus stuostus i atgadejumus. Zeimeigi, ka pavysam “najauši” ari Skryndu dzymtys muzeja kruojumā atsaroda instruments, kuram da tam nivīns nazynova nūsaukuma. Piec konsuļtacejis ar Gintaru Andrijausku, izaruodeja, ka tys ir unikals instruments – basa mandolina, kaidu pat cīši daudz pīredziejušais leitovīšu muzykants sovā dzeivē nabeja redziejs. Papietejūt Vabalis školys foto arhiva materialus, fotografejuos ira radzams, ka itei basa mandolina tyka spālāta 20. g. s. 60. godūs školys mandolinistu ansamblī. Īspiejams, ka instruments ir školuotuoja K. Strupuo dorbs.

Ituo gods 11. majā Ambeļu folklorys kūpa “Speiga” brauce iz Zarasu rajonu Leitovā, kur pīsadaleja 31. Storptautyskuo festivala “Sėlos muzikantai” divejūs koncertūs. Nu reita ambelīši energiski spēlēja tautys muzykys programu kapelu koncertā “Eurovyža” Slīninku iudiņa dziernovuos, kur muzicēja ari muzykanti nu Leitovys, Igaunejis, Suomejis. Vokorā Smalvu Vyssv. Jaunovys Marijis Rūžukrūņa bazneicā nūtyka 8. Storptautyskuo mandolinistu saliduojuma “Mandolinizmas” koncerts, kur “Speiga” izpiļdeja i pošu muzyku, i pīsabīdrova festivala orkestrī vairuokom desmitem mandolinistu.