Rokstu sagataveja: portals lakuga.lv

Maja suokuos grupa “Fak’n’turīs” publiciejuse sovu jaunuokuo dzīsmi “Kovida himna”, bet jau itamā pīktdīnē, 17. majā, kuops iz skotivis kai grupys “Dabasu Durovys” koncerta Daugovpilī gosti.

Grupā “Fak’n’turīs” muzicej: Mareks Gusāns (bungys), Margarita Kolosova (bolss), Rasma Kulamova (tausteni), Jurs Linužs (bass), Ingars Gusāns (gitara) i Arņs Slobožanins (gitara), bet jaunuos dzīsmis “Kovida himna” vuordu i idejis autore ir grupys bolss – Margarita. Kai stuosta basgitarists Jurs Linužs, grupys dzīsmis tūp vysim kūpā. “Atīmam iz mieginuojumu, pasadolam ar idejom, vysu bīžuok Arņam voi Ingaram ir jau kaida melodeja, kotrys izsoka sovys idejis, dalīk nazkū, varbyut pamaina tekstā,” par rodūšū procesu latgalīšu kulturys ziņu portalam stuosta Jurs.

“Mes ar grupu dorbojamīs vysā klusi, bet, kod saīmam kūpā, nazkū īrokstam. Grupa roduos iz sovulaik labi zynomuo projekta “Kapļi” bāzis, beja “Puskapļi”, bet golā jaunuo apvīneiba palyka par “Fak’n’turīs”. Vysi asam prīceigi sasatikt, bet tys mums nav nikaids primarais projekts,” par grupys darbeibu portalam stuosta juos gitarists Arņs Slobožanins. Jam pīsavīnoj Jurs, sokūt, ka grybātūs jau sasatikt bīžuok, bet kotram sovs dorbs i iz entuziasma pamata saīt sasalaseit viņ nu dorba breivūs breižūs. “Mes taidā sastuovā dorbojamīs saleidzynojūši naseņ i, ka saleidzynoj ar projektu “Kapļi”, kurā meklejami grupys aizsuokumi, asam rokeiguoki. Tei Ingara i Mareka ītekme!” nūsmej basgitarists, reizē stuostūt, ka niu ari grupai ir nūpītnuoka dzeivis iztvere – dzīsmēs asūšais kasdīnys i sadzeivis humors i dzīšmu temys palikuši nūpītnuoki.

Grupys dalinīki nanūlīdz, ka koč kod varātu gaideit nu jūs ari vasalu albumu. “Vyss iz tū īt! Ir īraksteitys i publiski skaniejušys jau vairuokys jaunys dzīsmis, vēļ vīna  – “Malna streipe, bolta streipe” – gaida sovu reizi,” grupys plānus atkluoj Arņs, stuostūt, ka mieginuojumūs sasateik Saļņovā, bet īroksti nūteik Buozovā. “Grupa “Fak’n’turīs” ir pateikama laika pavadeišona bez kaida spīdīņa. Golvonais, lai vysim ir lobs nūskaņuojums i prīca spēlēt,” jis sacynoj.

Muziki nūsmej, ka jim godā asūt videji treis koncerti – tyvuokais i cikom vīneigais skaidri zynomais paradzāts taišni 17. majā Daugovpilī.