Rogovkā gaidoms tautys muzykantu saīts “Večerinka “O, bļaka!””

Rogovkā gaidoms tautys muzykantu saīts “Večerinka “O, bļaka!””

Rokstu sagataveja: portals lakuga.lv

25. majā 19.00 stuņdēs Nautrānu sporta hallē-kulturys nomā Rēzeknis nūvoda Rogovkā jau treispadsmytū reizi nūtiks tautys muzykantu saīts “Večerinka “O, bļaka!””, informej pasuokuma organizatori.

Vēļ na tik seņ muzykys instrumentu spieliešona, dzīsmis i daņči tyka puormontuoti nu paaudzis paaudzē, tok nu 20. godu symta beigu, sadzeivē īīmūt tehnologejom, mutvuordu i paaudžu kūpeigys dorbuošonuos tradicionaluos kulturys tradiceju nūdūšonys veids ir byutyskai mazynuojīs voi pat pagaiss. Partū myusu dīnuos ir aktuala tradicionaluos kulturys tradiceju vuiceišonuos nu vacmeistaru voi lītpratieju i tūs īdzeivynuošona.

Tautys muzykantu saīts “Večerinka “O, bļaka!”” ir vīna nu bīdreibys “Rogovkīši” projekta “Tautas muzicēšanas tradīcijas Latgalē saglabāšana un popularizēšana” nūtikšonu, kas sajēme finansiejumu nu Vaļsts kulturkapitala fonda mierkprogramys “Latvīšu viesturiskūs zemu atteisteibys programa” atbaļsteituos Latgolys kulturys programys 2024. Nūsaukums “O, bļaka!” cielīs nu skuorda (bļakys) lūksnis nūsaukuma latgaliski, pa kurū izsytūt, skaņa dzierdama tuoli. Itys pasuokums jau treispadsmytū reizi Rogovkā teik reikuots dzejnīka, muokslinīka, Latgolys kulturys darbinīka, kurs sajiems ari Lelū folklorys bolvu, Ontona Kūkuoja (1940-2007) pīmiņai.

Itūgod večerinkys mierkis ir īpazeistynuot tuos apmaklātuojus ar tautys muziciešonys tradicejom i mutvuordu folkloru (ticiejumim, anekdotim, meiklem i c.). Tautys muzykantu saītā pīsadaleit ir sūlejuši  muzykanti nu tyvuokys i tuoluokys apleicīnis: vītejais muzykants Pīters Belinskis, “Kociņu kapela” nu Ciesim, Saļņovys kapela “Sveicinojam, vielejam”, Nikolajs Zaharovs nu Reigys, Daugovpiļs pusis tautys muzykanti Juoņs Mukāns Aleksandrs Baginskis i Juoņs Gipters, Baļtinovys kapela, Rēzeknis pusis tautys muzykanti Ontons Savickis, Ontons Butkāns, dzīsminīks Vinsents Kūkuojs i Rihards Kūkuojs, Zviergzdinis kapela, Bolvu pusis tautys muzykanti Eventijs Zelčs, Venārs Dūre, Vitālijs Plešs, Pīters Jermacāns, Genādijs Rudukovs, Leontīns Bērziņš, Brīžucīma damu apvīneiba “AMMA” i cyti.

Pasuokumu vadeis Dekteru amaterteatris, kas ir Rēzeknis nūvoda goda bolvys kulturā 2023 sajiemieji nominacejā “Goda muokslinīcyskais kolektivs”.

Sovutīs rudiņa pusē bīdreiba “Rogovkīši” organizēs meistardarbneicys, kur lītpratiejs Gunārs Igaunis interesentus īpazeistynuos ar tautys muzykys instrumentim, kas Latvejā spālāti pādejūs 150 godūs. Gunārs Igaunis na tik stuosteis par itūs instrumentu rasšonuos viesturi, tok ari demonstrēs, kai tūs spielēt.


Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]