Rokstu sagataveja: portals lakuga.lv

Itamā nedeļā Latvejis Radejis eterā raidejumā “Ielūdz Radioteātris” izskanēs jau trešais Latvejis Radejis Latgolys multimedeju studejis i latgalīšu kulturys kusteibys “Volūda” sadarbeibys projekts myusu dīnu latgalīšu prozys dorbu īskaņuošonā. Deļtuo īsacejumus, kū raudzeit pīdzeivuot šūnedeļ, sagatavejuse Latvejis Radejis Latgolys multimedeju studejis vadeituoja Renāte Lazdiņa.

Gordī radejis skaitejumi latgaliski

Itei nedeļa byus tei, kod nu 21. da 24. maja kotru vokoru 22.05 stuņdēs Latvejis Radejis 1 eterā raidejumā “Ielūdz Radioteātris” izskanēs breineigi i gordi radejis skaitejumi latgaliski ar stuostim, kū sarakstejuši taidi myusu dīnu literati kai Annele Slišāne, Valentins Lukaševičs, Raibīs i Egita Kancāne, bet sadarbeibā ar akterim Ingu Misāni-Grasbergu, Katrīnu Grigu i Juoni Krūni cīši prasmeigi īskaņuojs Kristaps Rasims. “Stuosti latgaliski” nūvess otkon bierneibā, ļaus īsavērt sīvītis sarežgeitajā pasaulī, atdareis plotuoku horizontu kotra autora rokstu i dūmu pasaulī. Ka vokori aizjimti i nasaīt nūsaklauseit eterā, tod latvijasradio.lv voi mobilajā lītuotnē stuostus var jimt leidza i klauseitīs kaidā cytā ārtuokā šaļtī, par pīmāru, revejūt duorzu voi īmūt puorguojīnī.  

Azaru stygys kilometri zam kuoju

Vīns nu puorguojīņu veidu, kaidā var īt, ir kaids pūsmys nu vaira nakai 1100 kilometru garuos Latgolys “Azaru stygys” (Ezertaka), kurā Latgolys turisma asociaceja regulari reikoj ari Latgolys puorguojīņu dīnys. Azaru styga ir breineigs veids kai izzynuot myusu pošu Latgolu, drūsai izstaiguot leluokus i mozuokus ceļus i stidzenis, kū varbyut cytaiži nabyutu īguojs pruotā paraudzeit izīt. Bet vēļ vīna cīši loba līta – piec lobys īšonys spākus var dabuot atpakaļ, nūsamaudojūt kaidā Latgolys azarā. Tyvuokuo Latgolys puorguojīņu dīnys nūtikšona ir 26. majā Bolvu nūvodā. Iz itū nūtikšonu registraceja nūsaslāguse i jaunus daleibnīku dasacejumus vaira napījem, bet aicynoju sekuot leidza “Azaru stygys” aktivitatem i izzynuot, kod var pīsavīnuot kaidā cytā kūpeigā īšonā.

Doncuošona zam zvaigžņuotu dabasu i ar ļusteigim muzykantim

Tai kai poša asu izauguse piļsātā, zaļumbals maņ vys tik vaira voi mozuok saīt taida kai eksotika, deļtuo vēļ vaira pīdzeivuošonys vārta! Sastdiņ, 25. majā, vīnu taidu zaļumbalu varēs baudeit Rēzeknis nūvoda Lūznovys muižā, kur Lelajā Latgolys zaļumbalā padoncuot zam zvaigžņuotu dabasu, ļusteigu muzykanti spālātuos muzykys ritmā varēs pi vīnys nu skaistuokūs Latgolys kulturviesturis pērļu. Kur vēļ skaistuoku i romantiskuoku vosorys suokšonūs!