Rokstu sagataveja: portals lakuga.lv

Izdevnīceiba “Talka” (bīdreiba “Orbīta”) sadarbeibā ar Latgolys fotografu bīdreibu izdavuse fotografa Juoņa Gleizda fotogruomotu “Gleizda metode”, kurā sūpluok 133 biļdem puorskaitomi ari teksti par fotografa rodūšū dorbu, dzeivi i dorba metodem latvīšu literarajā, latgalīšu i angļu volūduos.

Kai viestej gruomotys izdevieji, fotogruomota “Gleizda metode” byus vēļ vīns sovpateigs muokslinīka Juoņa Gleizda, kurs ituo gods majā teik gūdynuots 100. jubilejā, portrets, ļaunūt skaiteituojam nūvērtēt juo fotografejis tehnologeju izmontuošonys meistareibu, kai ari muokslinīka īškejū spāku, puorvarūt sovus fiziskūs īrūbežuojumus. Gruomotā dalyktī materiali paruoda ari dziļū saplyusšonu storp Gleizda rodūšuos praksis metodi i juo oficialū dorbu Traumatologejis i ortopedejis institutā.

Gruomotā, kas ir viertejams kai šmuks muokslys izdavums, publicātys 133 biļdis – muokslinīka skicis, vysaidu stylu fotografejis, kai ari itamā izdavumā pyrmū reizi publicātys vairuokys fotoserejis. Boguoteigū ilustraceju publikaceju papyldynoj ari informaceja par fotomuokslinīku tehniskajim pajiemīnim, kurūs vydā fotografiešona ar monokli i meiksta fokusa objektivu, izoheleja, makrofotografeja, kontaktkopiešona i vairuoki cyti. Gruomotu papyldynoj ari vizualuos kulturys pietneicys Liānys Ivetis Žildis i Juoņa Gleizda kruojuma globuotuoja Igora Pliča piecvuordi.

“Cylvāks i tehnologeja, doba i kultura, sīviškais i veiriškais, muoksla i amaterismys, tradiceja i revoluceja – pusgodsymta piečuok Gleizda dorbi itamā izalaseišonā aicynoj puorvērtēt binaruos kategorejis i pīduovoj arviņ jaunys analizis molys. Sevkura muokslinīka nakritiska sova veida īceļšona svātūs kuortā var draudēt ar ībaļzamiešonu i bīzu putekļa kuortu, kas naaicynoj dasadūrt. Stuovēt uorpus laika nav varams, bet puordzimt jaunā laikā i skatejumā ir privilegeja,” piecvuordā roksta Liāna Ivete Žilde.

Sovā ziņā izdavums ir unikals ari ar tū, ka vysi teksti – tymā vydā informaceja par fotografiešonys tehnikom – daīmami latgaliski. Pi jūs struoduojušys latgalīšu rokstu volūdys specialistis Māra Mortuzāne-Muravska i Ilze Sperga.

Fotogruomotys sastateituoja ir muokslys kuratore, vairuoku fotogruomotu sastateituoja Anna Volklova, bet redaktors i Juoņa Gleizda tehniskūs pajiemīņu aprokstu autors – fotografs Vladimirs Svetlovs. Gruomotys izdūšonu atbaļstejs Vaļsts kulturkapitala fonds. Fotogruomota ir daīmam kotram grybātuojam nūpierkšonai ITE.