Juoņa Trūpa 100. godadīnai veļteituos iztuodis “Juoņs nu Dzeņagola” atkluošona (+FOTO)

Juoņa Trūpa 100. godadīnai veļteituos iztuodis “Juoņs nu Dzeņagola” atkluošona (+FOTO)

Rokstu sagataveja: portals lakuga.lv

Tyvojūtīs īvarojamuo latgalīša Juoņa Trūpa jubilejai, Latgolys Kulturviesturis muzejs 21. majā atkluoja izstuodi “Juoņs nu Dzeņagola” (Jōņs nu Dzeņagola). Atmūdys laikā Juoņs sovys ilustracejis pats nūsyutejs muzejam, tok niu materialu papyldynuojuši viesturnīki Silvija i Juoņs Laizāni, kuri sovulaik izpietejuši i savuokuši materialus par sovu tāvabruoli. Jis niu apsaverams izstuodē.

Juoņs Trūps – muokslinīks, publicists, literats, redaktors i kulturys darbinīks. 1924. goda 27. junī pīdzims Sakstagola pogosta (niu Drycānu pogosta) Dzeņagola cīma “Lejīšūs”. “Juoņs ir Vladislava Luoča (Lōča) leidzstruodnīks, revolucionars i krass latgalīts ar styngru personeibu, karuoja pret uļmanistim, komunistu pīkritiejim i tim, kuri puorsačyuļuoja,” tai par Juoni izstuodis atkluošonā saceja Silvija Laizāne. 

Karteņā: Juoņs Trūps pi rokstammašynys Amerikys Savīnuotajuos Vaļstīs

Na tik Juoņs, tok vysa juo dzymta ir bejuse izcyla. “Kai Drycāni, tai dricānīši pamatuoti var byut lapni ar sovu pusi, ar sovim cylvākim, kam taidu personeibu tamā pusē ir daudz – kai ar sovu izkūptū tautys muokslu, tai ar tradicejom. Šudiņ mes paruodeisim vīnu nu jūs,” tai saceja muzeja direktore Anastasija Strauta.

Juoņs īsuoce vuiceitīs Rēzeknis Vaļsts gimnazejā, tok vaidi vuiceibys puortrauce i 1944. godā jis tyka īsaukts Latvīšu legionā. Legionara ceļš jū nūvede iz Vuoceju, kur jis laiku natērēja i Vircburgā pabeidze gimnazeju, vāluok tī vuicejuos ari filozofeju i literaturu. 1951. godā nūbrauce iz Amerikys Savīnuotajom Vaļstim, kur studēja muokslu. Amerikā Juoņs apprecēja ar latvīti Tamāru Bičevsku i apsamete Arlingtonā, kur sovu sātu ari nūsauce par “Lejīšim”.

Nu 1960. gods J. Trūps aktivi struoduojs kai trimdys izdavumu ilustrators. Jis ir zeimiejs vuokus gondreiž vysim “Tāvu zemes kaledarim”, gruomotom “Dorvas cīma ļaudis”, “Pīters Vylāns”, zeimiejs ilustradejis žurnalam “Dzeive” i cytim izdavumim. Bejs ari leidzredaktors vysaidim izdavumim i nu 1985. da 1989. goda par sovim leidzeklim izdevs žurnalu “Latgaļu Ziņnesis.”

Karteņā: Izdavumi, kurim Juoņs Trūps bejs publicists, redaktors i ilustrators

1975. godā ari izdūts J. Trūpa dzejis, satirys i karikaturu kruojums “Lapsines”, kurā ir patriotiski, osi i satiriski teksti, kurus rakstejs ar pseidonimu Jerums Osvejs. Juoņam bejuši ari taidi pseidonimi kai Dzeņupeits, Salimons Pyurs, J. Sylagaiļs, Sylagaiļu Broņkels, Juoņs Smyldzāns, Bukarogs i Kacarāgs.

1989. godā 65 godu vacumā Juoņs nūguoja myužeibā, jis paglobuots Rock Creek kopūs natuoli nu Vašingtonys.

Ekspozicejā apsaverami treis stendi: “Dzeņagola Lejīši”, kas stuosta par saimi i dzymtū sātu, “Juoņs nu Dzeņagola”, kas viestej par pošu Juoni, “Misters Juoņs pasaulē”, kur apsaverami materiali, kas syuteiti nu uorzemu. Tok iz sīnu radzami juo grafikys dorbi i var puorskaiteit viestulis, kurys Juoņs syutejs sovejim iz Latgolu. 

Fotogalereja nu izstuodis “Juoņs nu Dzeņagola” atkluošona. Foto: Amanda Anusāne.


Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]