Rokstu sagataveja: portals lakuga.lv

Gatavejūtīs svieteit vosoru i “Borowa Mc” 20. dzimšonys dīnu, grupa izdavuse jaunu dzīsmi “Prūjam juoīt”, informej tuos liders Aigars Runčis. Dzīsme ir parafraze par grupys 20 godūs pīdzeivuotū, suocūt ar pyrmajim koncertim i jutūni kulturys nomūs vysā Latvejā, da atmiņu “kai beja” i puordūmu “kai byus”.

“Dzīsme nav par atsavadeišonu, bet atmiņom! “Prūjam juoīt” ir vuordi, kū nagribi dzierdēt, kod esi satics draugus i baļļojīs,” soka grupys daleibnīks i dzīsmis teksta autors Aigars Runčis. Dzīsmi īraksteja Fakts (Jānis Šmēdiņš), i īrokstā pīsadola Katrīna Dimanta, kas īnas tautysdzīsmis motivu i ir kai zamapzinis bolss, kas soka, ka baļļuot vēļ nav gona, vystik – juoīt iz sātu. Dzīsmis teksta video sataisejs Regnārs Rudus.

Tai kai itūgod grupa “Borowa Mc” svietej 20. dzimšonys dīnu, rudinī plānuoti vairuoki jubilejis koncerti, pīmāram, 19. oktobrī Latgolys viestnīceibā “Gors”, uz kurū var jau nūpierkt beletus.  

“Prūjam juoīt” ir pyrmais grupys “Borowa Mc” singlys itūgod, kas sekoj pārņ izdūtajai dzīsmei “Atmosfera”. Grupa “Borowa Mc” dybynuota 2004. godā i ir izdavuse treis studejis albumus. Zynomuokuos grupys dzīsmis ir “Vysskaistuokai meitiņai”, “Maņ navajag”, “Iededzies par Latviju” i cytys. Grupa sajāmuse treis Latvejis Muzykys īrokstu goda bolvys. “Borowa Mc” dorbojās Aigars Runčis, Guntra Kuzmina-Jukna i Ingars Gusāns.