Rokstu sagataveja: portals lakuga.lv

Tulkuotuojs i literarais agents Džeids Vils (Jayde Will) sajiems “Premio Ostana” tulkuošonys bolvu taišni par dorbu ar latgalīšu literaturu i latgalīšu volūdys padareišonu vīnleidzeiguoku ar cytom Latvejā lītuotajom volūdom, viestej platforma “Latvian Literature”.

Džeids Vils ir literats, tulkuotuojs i literarais agents, kurs tulkoj nu latvīšu, latgalīšu, leitovīšu, igauņu i vuocu volūdys iz angļu volūdu. Jis dzims Nebraskā, ASV, 90. godu beiguos puorsacieļs iz Igauneju, kur Tartu Universitatē dabuojs magistra gradu suomugru volūdnīceibā. Nu 2007. gods jis ir puortulkuojs ap 30 gruomotu, suocūt nu Leitovys viesturis da latvīšu dzejis. 2020. godā izdevnīceiba “Francis Boutle Publishers” izdeve bilingvalu dzejis antologeju “The Last Model/Pādejais modeļs”, kurā Džeids beja atdzejuojs latgalīšu autorus Ligiju Purinašu, Raibū i Ingridu Tāraudu. Portala lakuga.lv sarunu ar Džeidu var skaiteit ITE.

Džeida Vila tulkuojumi regulari teik publicāti ari vysaidūs kruojumūs i antologejuos, sovutīs juo poša esejis, stuosti i dzejūli atrūnami vysaidūs literaturys i dzeivisstyla žurnalūs. Par Alberta Bela romana “Bezmiegs” tulkuojumu angļu volūdā jis 2020. godā sajiems Storptautyskuos rakstnīku i tulkuotuoju sātys i Ventspiļs piļsātys literarū bolvu “Sudraba tintnīca”. Nu 2016. gods Džeids struodoj platformā “Latvian Literature” kai literarais agents. Jis ari niu turpynoj dorbu ar latgalīšu literaturu, struodojūt pi Ligijis Purinašys i Valentina Lukaševiča jaunuokūs dzejūļu tulkuojumu.

Pamatuojumā par bolvys pīškieršonu raksteits, ka nu 2018. gods, kod Džeids Vils suocs interesētīs par latgalīšu volūdu, jis aptviers vierteibys, kas tū raksturoj, i izlics sev par miseju ar jaunuokū latgalīšu dzeju īpazeistynuot skaiteituojus Eiropā i vysā pasaulī. Tū jis dora ari kai literarais agents, sasadorbojūt ar izdavumim i literaru pasuokumu organizatorim, popularizejūt latgalīšu autorus dzejis festivalūs uorzemēs. Džeids Vils “paplašynoj latgalīšu kulturys dateikameibu i rauga aiz individualu autoru tekstim izgaismuot vasalu sabīdreibys grupu”.

“Premio Ostana” aba Ostanys bolva ir literaturys, tulkuošonys, muzykys i kinys bolva, kas veļteita dzymtajom volūdom, naatkareigi nu tūs runuotuoju skaita voi teritorejis leluma. Tū pasnēgs Ostanā, Italejā, juņa beiguos.