Pīterdīnā Jaunmūku pilī varēs baudeit latgalīšu kulturu  

Pīterdīnā Jaunmūku pilī varēs baudeit latgalīšu kulturu  

Rokstu sagataveja: portals lakuga.lv

Pīterdīnā, 29. junī, Jaunmūku piļs aicynoj latgalīšus i latgaliskuo cīneituojus sasatikt Kūrzemē pasuokumā “Pīterdīna jeb latgaliskuos nūtikšonys Jaunmūkuos”, kab baudeit latgaliskū kultūru, volūdu, teātri, muzyku i iedīņus vysys dīnys garumā. Gostūs byus Bolvu nūvoda Baļtinovys pogosta amaterteatris “Palādas”, kūklātuoja Jadviga Mežniece, folklorys kūpa “Grodi”, tierguotuoji i amatnīki.

Kab īpazeit Kūrzemis pusei naīrostū i īsavērt latgaliskajā, Jaunmūku piļs 29. junī pīduovuos plotu nūtikšonu programu. Nu 14 da 20 stuņžu gostim byus vareiba apmeklēt tierdzeņu, kurā Latgolys i latgalīšu amatnīki i mozī ražuotuoji byus sagatavejuši vysaiduokus gordumus i izstruoduojumus. Da 22. juņam tyvuokys i tuoluokys apleicīnis dalinīki teik aicynuoti dasasaceit, nūlykums daīmams ITE.

15.00 stuņdēs paradzāts atkluošonys pasuokums, kurā latgalīšu dzejis kolažu izpiļdeis Tukuma E. Birznieka–Upīša 1. pamatškolys školāni, latgalīšu volūdys skotivis runys konkursa “Vuolyudzāni” uzvarātuoji, kai ari byus Jadvigys Mežniecis i Aijis Monikys Vininis kūklis koncerts “Morguošona”. Koncertā tiks izdzīduotys dzīsmis Latgolai tradicionalūs instrumentu pavadeibā, tautysdzīsmem sasavejūt ar muziciešonys breiveibu i kūklis skaņom.

Nu 16.00 stuņžu piļs gosti byus aicynuoti iz kasdīnā naīrostu ekskurseju – latgalīšu volūdā ar gidu varēs dazynuot piļs viesturi i tuos nūslāpumus. Daleibys moksa – 5 eiro nu personys.

16.45 stuņdēs nūtiks kūklis meistarklase ar Jadvigu Mežnieci i Aiju Moniku Viniņu. Aicynuots var sevkurs interesents ar sovu kūkli. Daleiba meistarklasē byus īrūbežuotam skaitam, deļtam lyugums īprīšk dasasaceit, rokstūt iz info@jaunmokupils.lv voi zvonūt 26187442. 

18 stuņdēs byus dīnys gaideituokuo nūtikšona – Baļtinovys amatīrteatra “Palādas” izruode “Ontans i vampīri”. Teatra izruodis beleta cena – 10 eiro.

20.00 stuņdēs sevkurs tyks aicynuots turpynuot baudeit Pīterdīnu ar dzīsmem, daņčim i spēlem vakariešonā pi gunkura ar folklorys kūpu “Grodi”. Beletu cena – 10 eiro.

Vysys dīnys garumā vosorys duorza terasis kopejneicā apmaklātuojim byus vareiba nūbaudeit “Latgolys garšys” ar taidim tradicionalim iedīnim kai asuškys.

Svātku baudeituojim byus ari vareiba Jaunmūku pilī apsavērt izstuodi “Rakstu raksti”, kū pīduovoj Latgolys etnografiskuo viestnīceiba – ar zeimiejumim iz svīsta papeira i etnografiskajim cymdim. Taipat byus ari izstuode “Čošnī deči” nu Zīmeļlatgolys – Baļtinovys muzeja i privatpersonu kruojumu i izstuode “Sakrālais Tevī un apkārt”, kas ļaus īsavērt latgalīša pasauļa redziejumā. Vēļ ari vīnreizeiga vareiba Meža muzejā apsavērt 20. godu symta 70. i 80. godu sagataveituos Latgolys mežryupnīceibys saimisteibu albumus nu Jaunmūku piļs muzeja kruojuma.

Dīnys belets pasuokumā (ekskurseja ar gidu latgalīšu volūdā, teatra izruode i vakariešona) – 20 eiro. Bezmoksys īīšona bārnim da 7 godu vacuma. Saimu gūda aplīceibu eipašnīkim, školānim, seniorim i cylvākim ar kusteibu traucejumim, taipoš ari bīdreibys “Latvijas Piļu un muižas asociācija” bīdrim, uzruodūt aplīceibu ar dzimšonys vītu Latgolā – 20 % atlaide.


Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]