Radeit vēļ daudzi prīcys – kai jubilejā sveicynuoja dzejneicu Annu Rancāni

Radeit vēļ daudzi prīcys – kai jubilejā sveicynuoja dzejneicu Annu Rancāni

Rokstu sagataveja: portals lakuga.lv

Rēzeknis nūvoda Lūznovys muižys Kulturys škiunī 14. junī, sasateikūt Annys Rancānis saimei, draugim i talanta meiļuotuojim, tyka svieteita dzejneicys jubileja. Pasuokumā pīsadaleja veiru kors “Graidi” ar dirigentu Edgaru Kārklinieku, “Sovvaļnīks” i Mareks Gusāns, kadriļu grupa “Lūznovys kadriļs”, sovpus ar instrumentu spēli prīcynuoja Antra Toporkova i Ērika Ruhmane, bet pasuokumu vadeja Rēzeknis Tautys teatra akters Juoņs Pampe, kura bolsā tyka īdzeivynuotys ari Annys ailis.

Annys Rancānis autorvokors beja plotai apmaklāts ar gostim nu tyvuoku i tuoluoku apleicīņu. Publiskus sveicīņus veļteja pasuokuma organizatore Ilga Šuplinska, Rēzeknis nūvoda pošvaļdeibys puorstuovi, Rēzeknis Tautys akters Juoņs Pampe, Latgalīšu kulturys bīdreiba, taipat ari Annys saime.

Pasuokuma gaitā Lūznovys muižys vadeituoja Iveta Balčūne izasaceja, ka Anna Rancāne ir Lūznovys muižys mūza, latgaliskuos dvēselis mūza, rodūšuma i sovpateibys mūza, tei, kura ar sovu pīraksteitū vuordu paruoda eistynu dziļumu.

Sovpus poša Anna Rancāne vysapyrma saceja paļdis vysim apmaklātuojim, taipat nadamiersa pīminēt ari veiru kori “Graidi”, kurs pārņ dzīšmu svātkūs sajēme apbolvuojumu kai lobuokais veiru kors. Uzrunā Anna saceja, ka tod, kod nazkas lobs nūteik ar myusejim, ir taids īškejais pacyluojums, tys ir tys ašņa bolss. Jei ari darunuoja, ka Latgolā ir taida eipašeiba, ka te vysi ir kai saime, kas varbyut mums īt nu tuo, ka nazkod beja leluos saimis, kur cyts cytu piec vajadzeibys pavylka iz augšu.

@voluuda

Rēzeknis nūvoda @Lūznavas muiža Kulturys škiunī 14. junī, sasateikūt Annys Rancānis saimei, draugim i talanta meiļuotuojim, tyka svieteita dzejneicys jubileja. ℹ️ Vaira izzynoja lakuga.lv #AnnaRancāne #latgale #latgaliski

♬ original sound – Volūda

“Šūbreid Saeimā ari ir tai, ka es varbyut asmu vysim apnykuse ar tū Latgolu i na vysod ir tei sapratne, ka mums gribīs byut pošim, ka mums gribīs saglobuot sovpateibu i identitati. Mums gribīs na jau žāluotīs i byut tim naboga radinīkim, kas īt ar pastīptu rūku, tok byut sovim, byut pošym! Ite vysi cylvāki ir tī, par kurim varu saceit, ka jius asat sovi!”, tai Anna Rancāne.

Galereja: foto autore Amanda Anusāne, portals lakuga.lv


Print Friendly, PDF & Email