Rokstu sagataveja: portals lakuga.lv

Ir augusta vyds i niu kluotyn vīna nu goda gaideituokūs nūtikšonu Latgolā – Aglyunys svātki. Itūreiz ar nedelis īsacejumim pasadola aktiva i rodūša jaunīte nu Rēzeknis, kurys sirdslīta ir īšona svātceļuojumūs – tei ir Klaudija Dembovska. Jei īsoka ari rast sovus talantus muokslā i pīminēt nūzeimeigys personeibys – Bronislavu Martuževu. Poša Klaudija ir ari vīna nu ituo gods Pīteram Jurciņam veļteituo literatu konkursa laureatu, kurys lugu “Krystamuote” var puorsakaitei ari latgalīšu kulturys ziņu portalā ITE.

Paraugi rūku muokslā

Ir vosorys trešais mieness, kod doba nūbrīst i, ruodīs, ka koč kas ari pošā cylvākā. Taidys šaļts var īgravēt atmiņā voi iz lopys. Kas zyna, varbyut tai atrassi sovu talantu.

Paej gabaleņu kuojom

Itūnedeļ ir Aglyunys svātki. Jūs varēs redzēt televizejā i dzierdēt radejā, daudzi brauks ar mašynom i autobusim. Paej gabaleņu kuuojom – koč voi drupeiti, kam mes tik bīži koncentrejamīs iz mierki, ka pagaist ceļa izbaudeišona, byušona procesā i kusteibā. Kai saceja muns bruoļs – pītryukst dinamikys!

Gaidoma Bronislavys Martuževys dzīšmu gruomotys atkluošona

25. augustā byus Bronislavys Martuževys dzīšmu gruomotys atkluošona Lubuonā (vaira informacejis ITE). Muns īsacejums ir pameklēt informaceju par juos personeibu. Latvejis Radio ir sataisejuši puora raidejumu par jū, nūsaklauseit var ITE. Taipat var paskaiteit ari kaidu gruomotu par Bronislavu, eipaši juos dzeju.