Rokstu sagataveja: portals lakuga.lv

Škola nu ir suokusēs i tematiski itai nedeļai īsacejumus sagatavejuse Nautrānu vydsškolys školuotuoja Ilona Punāne. Jei vuica kai geografeju, tai latgalīšu volūdu i itūnedeļ tev īsoka kulturali i aktivi pavadeit laiku.

Nakts puorguojīņs

Muns moto: vasalā mīsā vasals gors! Giunam vosoru aiz astis ci aiz spuornu. Kusteibys svaigā gaisā naspiej aizvītuot nikas, partū muns pyrmais īsacejums ir nazkas jauns – 17 km garais nakts puorguojīņs Rēzeknis nūvodā. Puorguojīņa maršruts ir riņdžveida, tys suocās pi dzeļžaceļa pīturys “Cirma”, turpynojās Sarkaņūs, Danskūs, Skobuļnīkūs i atsagrīž atpakaļ. Praktiska informaceja par puorguojīni ITE.

Literari pasuokumi

Ari dvēselei vajag giut jaunys vēsmis, satikt seņ naradzātus cylvākus i izrunuot, kas iz sirds. Tyvojās ari dzejis dīnys i diveji pasuokumi Rēzeknis nūvodā. Gulguošona Pleikšņu kolnā, par kuru vaira informacejis atrassit ITE. Kai ari pasuocīņs kai mīsai, tai dvēselei – trešuo “Dzejis voga”, kas vysu pyrma sasauks ailinīkus, tok piečuok ari ļusteigūs doncuotuojus ar grupu “Laimas muzykanti”. Informaceja par pasuokumu ITE.

Izruode komedejis žanrā

Navaru napasadaleit ari ar Gaigalovys kulturys noma amaterteatra “Bykovīši” izruodi “Ar spani pa golvu”, kas nūtiks Meirānu tautys nomā 8. septembrī. Ir taidys teatra trupys, iz kurūs izruodem es ītu ūtrū i trešū reizi (tuos pošys izruodis). Ītu piec emoceju, smīklu, latgaliskuos vidis i nūskanis… Reizi jau redzieju itū izruodi, cīši loba!