Rokstu sagataveja: portals lakuga.lv

Latvejis Nacionaluo biblioteka (LNB) i latgalīšu kulturys kusteiba “Volūda” nūtikšonu cyklā “Latviešu grāmatai 500” septembrī i oktobrī aicynoj iz treis lekceju cyklu “Latvīšu gruomotai 500. Fokusā Latgola”, kas veļteits latgalīšu volūdai i gruomatnīceibai. Reikuotuoju sagataveituo viests informej, ka lekcejis vadeis kartografe, nūvodpietneica Andra Zubko-Melne, viesturneica Kristīne Zaļuma i volūdneica Lideja Leikuma.

“Latvīšu gruomotai 500. Fokusā Latgola” lekcejis nūtiks ūtardīnem, 10. i 24. septembrī, kai ari 22. oktobrī nu 17.45 da 19.00 Latvejis Nacionaluos bibliotekys (LNB) telpā “Rešumu pasauļs” (5. stuovā).

Pyrmuo lekceja paradzāta 10. septembrī, tū vadeis kartografe, nūvodpietneica Andra Zubko-Melne, stuostūt par latgaliskūs vītvuordu viesturi, puormaiņom, izaicynuojumim i pasaruodeišonu literaturā. 24. septembrī LNB Letonikys i Baļtejis centra vadeituoja, viesturneica Kristīne Zaļuma stuosteis par muižu biblioteku kolekcejom kai olūtu Latgolys viesturis pietnīceibā, bet 22. oktobrī volūdneica Lideja Leikuma īpazeistynuos ar pyrmū laiceiguos literaturys dorbu latgaliski “Eisa muoceiba ap audziešonu bišu” (1832).

Nūtikšonu cyklys “Latvīšu gruomotai 500” ir pīcu godu (2021–2025) programa, kurā teik izcalti svareiguokī procesi, kas īkustynuojuši latvīšu raksteituo i īspīstuo vuorda izaplateišonu. 2025. godā tiks atzeimuota pyrmuos īspīstuos latvīšu gruomotys – ļutaru miša – pīci symti godu. Rudinī gaidomais lekceju cyklys ir Latvejis Nacionaluos bibliotekys i latgalīšu kulturys kusteibys “Volūda” kūpeiga ideja programā dagrīzt leluokys viereibys ari ūtymā latvīšu volūdys rokstu tradicejā – latgalīšu volūdā – publicātajim dorbim i volūdys atteisteibai kai taidai, veicynojūt sabīdreibys izpratni, izgleituošonu i zynuošonu daīmameibu par Latgolu i latgalīšu volūdu.

Vysys plānuotuos lekcejis kotram grybātuojam daīmamys bez īīšonys moksys, kai ari piečuok lekceju īroksti byus breivi daīmami nūsaklauseišonau ārtā formatā. Lekceju nūtikšonu atbolsta Sabīdreibys integracejis fonds nu Latvejis vaļsts budžeta daškiertūs Kulturys ministrejis leidzekļu projektā “Latgaliskuos kulturvidis styprynuošona: sadarbeiba, izpratne i īsaiste”.