Rokstu sagataveja: portals lakuga.lv

Raiņa sātā Berkenelē i Daugovpilī 13. i 14. septembrī nūtiks pasuocīņs “Dzejas, dejas spogulī” ar treis daļom: Dzejis dīnys, tradicionalūs deju (poļku) meistarklase i zaļumballe, informej pasuokuma organizatori.

Nūtikšonom boguotais nedeļgols aizasuoks pīktdiņ, 13. septembrī, Raiņa sātā Berkenelē, kur jau nu 17.30 stuņdem sevkurs ir gaideits iz tekstilmuokslineicys Gintys Kristjansonis personalizstuodis “Vārdene” attaiseišonu. Piec tam nu 18.00 stuņžu omotu darbneicā “Klēts” plānuota gruomotu mainis skapeiša atkluošona ar ailineicu Lindu Kilevicu. Sovutīs Lelajā klietī nu 18.30 nūtiks literari muzykala sasatikšona ar ailinīku i muzykantu Artūru Uškānu. Vokora nūslāgumā – pastaiga Berkenelis pusmuižys duorzā. Tī byus apsaverama fotostudejis “Ezerzeme – F” fotoizstuode “Raiņa dzejolis fotogrāfijā” i vidis objektu grupa “Prieki visās gadskārtās”. Vysu vokoru bārni varēs dorbuotīs Raiņa sātys Berkenelē bārnu ustobā, kur tematiskys rūtalis i spēlis vadeis školuotuoji. Taipoš ari vysu vokoru byus attaiseita aiļu tiejneica, kur izpyldūt Īlyukstis bibliotekaru sagataveitūs aizdavumus, varēs tikt pi gabaleņa uobeļmaizis i čaja. Daleiba vysuos aktivitatēs ir bez moksys.

Sastdīnis, 14. septembra, pyrmajā pusē paradzāta tradicionalūs deju (poļku) meistarklase Augšdaugovys nūvoda kulturys centrā “Vārpa”. Tū vadeis horeografiskuos folklorys specialiste Dace Smirnova. Itūreiz gūda vītā – poļka, kas rakstureiga rudiņam kai kuozu deja. Deju meistarklasis suoksīs ar registraceju 9.30 stuņdēs, piec tam byus treneņstuņde, lekceja par poļkom i meistarklase. Nūslāgumā dalinīki tiks pi aplīceibu. Meistarklasē aicyuots pīsadaleit sevkurs, kuram interesej folkorys deja. Cīši gaideiti ir Latgolys folkorys kūpu i deju kolektivu vadeituoji i dalinīki. Daleiba ir bez moksys. Leidza juojam deju kūrpis. Kab pīsadaleitu, īprīkš vajag pīsasaceit, da pyrmūdīnis, 9. septembra, sarokstūt anketu ITE.

Piec meistarklasis Raiņa sātā Berkenelē gaidoma zaļumballe. Sareikuojums suoksīs 15.30 stuņdēs ar folklorys kūpu dyžuošonūs, bet nu 16.00 da 18.30 vysi varēs izadoncuot daņčūs, kū spēlēs i vadeis Augšdaugovys nūvoda folklorys kūpys “Dyrbyni”, “Ritam”, “Speiga” i etnokompaneja “Zeidi” nu Reigys. Paraleli daņčim byus uobeļu peirāgu kulinaruos meistarklasis. Daleiba ir bez moksys. Dreskods – tautys tārps, 19. g. s. svātku drēbis ci tūs elementi.

Projekts “Brīvdabas deju tradīciju meistarklases Raiņa mājā Berķenelē” nūteik, kab veicynuotu sabīdreibys īsaisti i izgleituošonu Latgolys kulturys daudzveideibys saglobuošonā i atteisteibā, kai ari lai nūdrūsynuotu folklorys kūpu i breivdobys deju autentisku tradiceju aktualiziešonu i daīmameibu.