Rokstu sagataveja: portals lakuga.lv

Itūgod folkmetala grupa nu Daugovpiļs “Varang Nord” sovus klauseituojus prīcynuojuse ar vairuokim pyrmatskaņuojumim, tymā skaitā ari dzīsmi “Latgola”, kurai niu sataiseits videoklips.

Dzīsmis “Latgola” muzykys i teksta autors ir Maksims Popovs, orkestra pavadejumu sagatavejs dzīšmu autors Yuri Borin, apstruodi paveics Gints Lundbergs. Sovpus klipa režeja topuse, sasadorbojūt Maksimam Popovam, Jelenai Kalnišai, Nikitam Kobcevam, Vjačeslavam Janenam i Valērijam Solovjovam. Video i piecapstruodis autors ir Ivars Utināns.

Grupys puorstuovi par dzīsmi i videoklipu soka tai: “Dzīsme “Latgola” ir izjiutys pret myusu dzymtū zemi, sātom, Latgolys nūvodu. Kai dzīsmē, tai klipā raudzejom paruodeit i izstuosteit par Latgolu. Fiļmiešona ilga divejis dīnys, kuru laikā uzjēmem kadrus pi Valnazara, pi Egiptis bazneicys, ari Daugovpiļs cītūksnī i myusu dzymtuos Latgolys mežā. Atseviški kadri uzjimti kaļva darbneicā Rēzeknē. Mes asam cīši lapni ar itū dzīsmi i videoklipu par Latgolu i ar lelu cīnu nasam tū myusu klauseituojim vysā pasaulī, kuri vysleidz ar interesi grib dazynuot, nu kurīnis mes īmam i kaidā volūdā runojam.”

Itūrudiņ grupai “Varang Nord” paradzāta ari lela koncerture ar uzastuošonom Latvejā, Leitovā, Pūlejā, Čehejā i Igaunejā. Vaira dazynuot var, sekojūt grupys Facebook profilam ITE.

Folkmetala grupa “Varang Nord” ir dybynuota 2014. godā. Jī poši sevi sauc par Latgolys soltūs mežu grupu. “Varang Nord” apvīnoj skorbūs death metala rifus ar episkom akordeona dzīsmem, rodūt unikalu zīmeļu poguonu/folk metala sajaukumu. Jūs dzīsmis slavej varonu kauju, ašņainu uperi vacajim dīvim i prīceigu zīmeļu mīlasti ar nabeidzamim ols žbanim.