Rokstu sagataveja: portals lakuga.lv

Kab veicynuotu literarū procesu Latgolā i latgaliski raksteitūs tekstu radeišonu Latvejā, jau pīktū reizi latgalīšu kulturys kusteiba “Volūda” izsludynoj konkursu i aicynoj Latgolys kulturtelpai pīdareigūs prozys autorus pīsadaleit “Latgolys prozys skaitejumūs 2024”. Da ituo konkurss veicynuojs jaunu raksteituoju pasaruodeišonu latgaliskuos literaturys telpā, deļtuo konkursa reikuotuoji aicynoj jū izmontuot kai platformu ari debejis dorbu publiciešonai.

Autori aicynuoti īsyuteit pošu radeitus i da tuo napublicātus tekstus latgalīšu rokstu volūdā voi latvīšu literarajā volūdā. Dorbi tiks vārtāti, vysu vaira izceļūt literaruo teksta kvalitati i pīdareibu Latgolys kulturtelpai, tai atkluojūt regiona sovpateibu i paruodūt latgaliskumu juo plotuokajuos nūzeimēs. 

Pīsadaleit konkursā “Latgolys prozys skaitejumi 2024” var, īsnādzūt dorbus – esejis, stuostus, romanu fragmentus (7000–12 000 zeimu apmārā) – da ituo gods 20. oktobra, syutūt tūs latgalīšu kulturys kusteibai “Volūda” iz e-postu literatura@voluda.lv ar nūruodi “Latgolys prozys skaitejumi 2024″.  Pīsacejumā juobyut teksta elektroniskajai versejai, ziņom par sevi (vuords, pavuorde, dzimšonys gods, nūsadorbuošona, eisa rodūšuo biografeja (3–4 teikumi)) i kontaktinformaceja (telepona numers, e-posts). Ar pylnu konkursa nūlykumu var īpasazeit ITE.

“Latgolys prozys skaitejumi 2024” nūslāguma pasuokums byus ituo gods 5. decembrī kluotīnē Daugovpilī. Lobuokūs tekstu autori pīsadaleis nūtikšonā ar sovu dorbu skaitejumim, sovpus uzvarātuojam ar sova dorba skaitejumu byus pīduovuota vareiba pīsadaleit ari festivala “Prozas lasījumi 2024” nūtikšonuos i 2025. godā izmontuot nedeļu garu raksteišonys rezidenci Latgolā. 

Konkursā īsnāgtūs dorbus vērtēs žureja Latvejis literaturys procesūs īsaisteitu cylvāku sastuovā – literate Ilze Sperga, literaturzynuotneica Elīna Kokareviča, gruomotu blogere Inga Gedžūne, literaturzynuotnīks Valentins Lukaševičs i latgalīšu volūdys specialiste Maruta Latkovska. Konkursā treis vysuvaira punktu sajāmušī autori sajims atleidzeibys par dorbu publiciešonu 350, 250 i 150 eiro apmārā.

Latgalīšu kulturys kusteiba “Volūda” (bīdreiba “LgSC”) ir navaļstiska organizaceja, kas apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysa pyrma atbaļsteit jaunūs latgalīšu autorus i izdūt kvalitativu literaturu, viereibu vaira dagrīžūt jaunīšu auditorejai. Konkursa nūtikšona niu palykuse par stabilu tradiceju latgalīšu literaturā, kas profesionalā veidā izceļ prozys raksteituojus, īpazeistynoj ar jim skaiteituojus, kai ari ir nūzeimeiga platforma jaunu autoru pasaruodeišonai literaturys telpā. Konkurss “Latgolys prozys skaitejumi” ir daļa nu latgalīšu kulturys kusteibys “Volūda” eistynuotuos literaruos jaunradis latgaliski veicynuošonys programys. Nūsavērt pārnejuo gods konkursa nūslāgumu i nūsaklauseit finalistu dorbus var ITE.

Festivals “Prozas lasījumi” nūteik nu 1995. gods, jū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki.

Konkursa “Latgolys prozys skaitejumi 2024” nūtikšonu atbolsta storptautyskais literaturys festivals “Prozas lasījumi 2024”, Vaļsts kulturkapitala fonds, Daugovpiļs vaļstspiļsātys pošvaļdeibys īstuode “Vienības nams”, žurnals “Domuzīme” i latgalīšu kulturys ziņu portals lakuga.lv.