Rokstu sagataveja: portals lakuga.lv

Septembra pādejā svātdīnē, kas itūgod ir 29. septembrī, kai īrosts, riezeknīši i piļsātys gosti teik aicynuoti iz sasatikšonu viesturyskajā Latgolys īlā, kur nu 10.00 da 15.00 stuņžu nūtiks lelais Mikeļdīnys godatiergs “Buļbu tolka ar dzīdōšonu i doncōšonu”, informej pošvaļdeibys puorstuovi.

Tradicionalajā godatiergā gaidoma boguoteiga izklaidis programa i plots tierguotuoju pīduovuojums, kas tierguos kai lauku lobumus, tai amatnīku darynuojumus.

10.00 stuņdēs Mikeļdīnys “Buļbu tolku” īvadeis i rudiņa godatierga jutūni radeit paleidzēs pyušamūs instrumentu orkestris “Rēzekne” (vad. Sergejs Sergejevs i Juoņs Pavlovskis). Pasuokumu vadeis Buļbu Mikeļs aba Ilmārs Dreļs. Nu 10.00 stuņžu dorbuosīs Trušu sāta mozuokajim tierga apmaklātuojim. Sovutīs auto moto entuziastus prīcynuos Latgolys Retro auto moto kluba sezonys nūslāguma spākrotu saīts. Nu 11.00 da 13.00 stuņžu sevkuram byus vareiba īsasaisteit rodūšajuos darbneicuos. Nu 10.00 da 14.00 stuņžu byus daīmamys buļbu gataveišonys meistarklasis ar Latvejis Televizejis šova “Īstās latvju saimnieces” dalineicom – Annu Macāni nu Lubuona azara krostu i Almu Bērziņu nu Bauskys nūvoda, kurūs gataveitī iedīni “Brīža zupa ar buļvom” i “Buļbu putra ar mierci” puorsteigs na vīnu viņ interesentu. 11.30 stuņdēs paradzāts lelkoncerts ar Rēzeknis dzīdūšūs i doncojūšūs amaterkolektivu prīšknasumim i Leivuona amaterteatra eipašajim gostim, aktrisem Moņu, Broņu i Toņu, kai ari režisoru, akteri i muzykantu Oskaru Bērziņu.

Tierga apmaklātuojim juojam vārā, ka tuo laikā transportleidzekļu kusteibai byus slāgts Latgolys īlys pūsmys, kai ari tiks īvīstys izmainis SIA “Rēzeknes satiksme” autobusu kusteibys maršrutūs.