Rokstu sagataveja: portals lakuga.lv

Oktobris īsasuocs ar muzykys jaunumim latgalīšu volūdā – repers Bruolāns publicējs albumu “Bagāža”, kas radeits sadarbeibā ar bītmeikeri Jezupu. Albumā īkļautys 13 dzīsmis.

Kai naseņ intervejā portalam lakuga.lv saceja Edgars aba Bruolāns: “Jaunais albums “Bagāža” ir konceptuals, tys sastuov nu treis daļu, nu muna tymsuokuo punkta iz gaišuokū punktu.” Taipoš jis ari pasadaleja, ka albums ir par jū pošu i par pīdzeivuotū godu laikā, par sajiutom, par bezatbiļdeigu dzeivis veidu.

Albumā izskaņ ari sadarbeibys ar Danu Vasiļjevu i DJ Valnu, vysu bītu autors ir Jezups. Vysi albuma teksti ir latgaliski.

“Ir lela prīca i lapnums par albumu. Jiutu ari atvīgluojumu, kam albums topa vairuokus godus, šaļtim jau ruodejuos, ka nikod nasasajimsim tū izlaist, vystik tys ir nūvasts da beigu. Īrokstu process nastuov iz vītys, struodoju pi jaunim projektim i nasataisu apsastuot,” tai Bruolāns.

Plānuots, ka albuma prezentaceja gaidoma nazkod zīmā, kod tys byus daīmams ari fiziskā formatā.