Rokstu sagataveja: portals lakuga.lv

Pyrmū reizi Rēzeknis nūvoda Strūžānu kulturys nomā 30. novembrī 13 stuņdēs byus jauna nūtikšona – Latgolys nūvoda folklorys kūpu i folklorys atzaris kolektivu “Apdzīduošonys dzīšmu olimpiade” ar nūsaukumu “Vysi ļauds breinejuos”, viestej Dricānu apvīneibys kulturys darbinīku sagataveituo informaceja.

Senejuok apdzīduošonys dzīsmis beja sevkurūs gūdu naatjemama daļa, niu drupeit damierstys, taišni deļtuo pyrmū reizi Rēzeknis nūvoda Strūžānu kulturys nomā plānuota jauna nūtikšona – Latgolys nūvoda folklorys kūpu i folklorys atzaris kolektivu apdzīduošonys olimpiade “Vysi ļauds breinejuos”. Kai viestej pasuokuma organizatori, olimpiade nūtiks četruos kuortuos, kuru laikā tiks nūskaidruoti zūbgaleiguokī, attapeiguokī i ļusteiguokī kolektivi. Olimpiadē paradzātys ari individualys saceņseibys, kur plānuots dazynuot, kura pogosta puorstuovim ir vysa osuokuo mēle, vysu dreižuokuo reakceja i plotuokuos apdzīduošonys folklorys zynuošonys.

Kai stuosta Drycānu pogosta Kulturys noma pasuokumu organizatore Sarmeite Stepiņa, kura ir ari vīna nu pasuokuma idejis autoru, pārņ Rēzeknis nūvoda dīnu laikā Drycānūs nūtyka medinīku svātki, kur folklorys kūpa dalinīki deļ medinīku kolektivu sagataveja apdzīduošonys dzīsmis. Apdzīduošona asūt saguojuse tik labi, ka taišni tai rodusēs dūma padareit jū par plotuoku nūtikšonu. “Nu suoku sprīdem, ka vajag organizēt festivalu, tok mudri nūguojom da dūmys, ka “festivals” niu jau cytu reizi palics par eistynu navuordu, deļtuo palykom pi “olimpiadis”. Mes pi ituo vaicuojuma pīguojom nūpītni i myusu ideju da gola paleidzēja nūvest Ēriks Čudars, kurs ir Latgolys apriņka koru viersvadeituojs, tok ari Drycānu apvīneibys folklorys kūpu vadeituojs. Nūlykumu paleidzēja sastateit Liene Brence, kurei ir Latgolys Muzykys i muokslys vydsškolys Tradicionaluos muzykys nūdalis vadeituoja. Es asu vysā puorlīcynuota, ka mums vysim kūpā saīs breineiga nūtikšona ar vazumu smīklu,” tai Sarmeite Stepiņa. Jei ari soka, ka iz prīšku olimpiade varātu palikt par vysys Latvejis, īspiejams, ka ari par storptautysku nūtikšonu.

Olimpiadē aicynuoti pīsadaleit Latgolys folklorys kūpys komanduos ar vysmoz treis dalinīkim. Olimpiadē paradzāti četri aizdavumi, par kurim vaira var puorskaiteit olimpiadis nūlykumā ITE. Komandys aicynuotys dasasaceit da 22. novembra, aizpiļdūt anketu ITE. Komandu pīsadaleišonu viertēs žureja, dalinīkim paradzātys pateiceibys, diplomi i bolvys.

Drycānu apvīneibys kulturys darbinīki, kas ir golvonī pasuokuma organizatori, eipaši pastreipoj, ka apdzīduošonu juojem ar vīglu goru i par tū nikaidā veidā navajadzātu apsavaiņuot. Tymā pošā laikā organizatori izsver, ka sevkuram ir juoizviertej bārnu i jaunīšu da 18 godu pīsadaleišona pasuocīnī, tai kai apdzīduošonys dzīsmēs nareši teik izmontuoti suleigi izteicīni.

Apdzīduošona ir humora pylna i lobvieleiga diveju pušu kārcynuošona car vysaiduokom dzīsmem i vuordu spēlem, kas izdūmuotys iz vītys. Dzīsmēs apdzīd laukus, lūpus, pasauļa nūtikšonys, taipat ari personu izskotu, paražys, padareitūs voi nadadareitūs dorbus.