Tihovsku saime ar jaunū dzīsmi atsazeist mīlesteibā Latgolai
Rokstu sagataveja: portals lakuga.lv
Patriotu mienesī dzīdūšuo Tihovsku saime – Dace, Laima i Dagnis – īskaņuojuši jaunu dzīsmi “Atsazeišona” ar dzejneicys Emilejis Kalvānis tekstu. Dzīsme asūt kai atsazeišona mīlesteibā Latgolai i veļtejums vysim, kurim tei sirdī.
Tihovsku saime turpynoj, ka dzīsme veļteita kai tim, kas ite dzeivoj i ar dorbim ceļ Latgolu gūdā, tai tim, kurūs liktiņa naparadzamī celi aizvaduši pasaulī. “Var vadeit dīnys symtu i tyukstūšu kilometru tuoļumā, tok palikt latgalīšam na tik dūmuos, bet ari dorbūs,” tai muzykaluo saime.
Dzīsmis vuordu autore ir Emileja Kalvāne, muzykys – Lolita Greitāne. Dzīd Tihovsku saime – Laima, Dace i Dagnis. Īrokstā pīsadalejuši ari Lolita Greitāne (klavīris), Agnese Greitāne (vejūle), Mārcis Lipskis (kontrabass). Īskaņuots Eināra Lipska skaņu īrokstu studejā. Dzīsmis pavadejumā gleznuoja Iveta Ladusāne.
